Talibanët thuhet se kanë konfiskuar pajisjet biometrike ushtarake amerikane që mund të ekspozojnë afganët që ndihmuan forcat e koalicionit – pasi ato përmbajnë të dhëna identifikuese si skanimet e bebes së syrit, shenjat e gishtërinjve, si dhe informacione biografike.
Një zyrtar i paidentifikuar i Komandës së Përbashkët të Operacioneve Speciale (JSOC) i tha ‘The Intercept’ se grupi konfiskoi pajisjet e zbulimit të identitetit ndërinstitucional të dorës (HIIDE) gjatë sulmit të javës së shkuar. Raporti u mbështet nga tre ish-ushtarakë amerikanë.
Ata i thanë gazetës se pajisjet portative mund të përdoren për të hyrë në informacione të ndjeshme nga bazat e të dhënave të mëdha dhe të centralizuara ushtarake, por vunë në dukje se ishte ende e paqartë se sa nga baza e të dhënave biometrike të mbledhura për popullsinë afgane është komprometuar.
Sipas një prezantimi të Trupave të Inxhinierëve të Ushtrisë Amerikane, pajisjet HIIDE përdorin të dhënat e mbledhura për të krijuar një ‘portofol’ që më pas mund të importohet në softuerin identifikues-përpunues të Biometrics Automated Toolset (BAT) si një ‘dosje dixhitale’.
Përveç gjurmimit të kryengritësve, Pentagoni gjithashtu thuhet se ishte i prirur të përdorte pajisjet për të mbledhur të dhëna unike mbi 80% të popullsisë afgane për të kontrolluar aktivitetet terroriste dhe kriminale. Burime të paidentifikuara thanë se detajet biometrike të vendasve që ndihmuan SHBA-në u mblodhën gjithashtu dhe u përdorën në kartat e identifikimit.
