Kryeministri Edi Rama ka dhënë sërish intervistë për një agjenci të huaj lajmesh.
Tema edhe këtë herë por për The Sunday Times ka qenë për strehimin e afganëve në vendin tonë.
Kryeministri Rama ka treguar përse është vonuar deri më tani ardhja duke qenë se shprehja e gatishmërisë për pranimin e tyre dhe ngritja e qendrave pritëse ka nisur para disa ditësh.
Rama thotë se në Afganistan nuk ka një koordinues e cila po vështirëson tërheqjen e tyre.
“Duket se nuk ka një koordinues atje, nuk ka një qendër të përbashkët operacionesh, nuk ka asgjë, vetëm secili për veten. Shumë shtete po kërkojnë një pikë kontakti të përbashkët, e lëre më organizatat humanitare që nuk e dinë kujt t’i drejtohen. Ende nuk ka asnjë mënyrë për t’i kaluar njerëzit nëpër porta nëse nuk jeni një shtet i madh, madje edhe për shtetet e mëdha duket mjaft e çrregullt. Kjo është arsyeja pse të gjitha organizatat janë të bllokuara. Shtetet e mesme ose të vogla nuk janë në gjendje të evakuojnë njerëzit siç ishte planifikuar. Ndryshe nga shumë vende të tjera evropiane“, tha ai,
Edi Rama i është rikthyer edhe njëherë historisë së Shqipërisë, teksa përmend se 30 vite më parë shqiptarët ishin si afganët, kurse për europianët luftën e njohin vetëm nëpërmjet Netflix.
“Për shqiptarët konflikti, uria dhe shpërngulja ishin përvojë në kujtesë.
Për ne, lufta ka qenë shumë e vërtetë. Ne kemi pasur luftë në derën tonë. Ne kemi parë njerëz të vrarë dhe kemi pasur njerëz që njohim që janë vrarë.
Për ne është shumë e qartë. Ne kemi qenë afganë tre dekada më parë kur ikëm nga ferri ynë. Evropianët e njohin luftën vetëm përmes Netflix-it, kurse për shqiptarët ishte e gjitha reale.
Pra, tani ata janë shqiptarët e 30 viteve më parë dhe ne duhet të jemi atje si të tjerët për ne”, shtoi ai.
