Qindra militantë të grupit Boko Haram sulmuan një qendër ushtarake në jug të Nigerit natën e së martës, duke vrarë 16 ushtarë dhe duke plagosur nëntë të tjerë. Ministria e Mbrojtjes tha se dhjetëra militantë u vranë në luftimet që pasuan.
Të mërkurën, Ministria e Mbrojtjes e Nigerit tha se forcat qeveritare kishin pësuar humbje të konsiderueshme pasi posta e tyre ishte zënë në pritë nga militantët e Boko Haram gjatë natës.
Ministria njoftoi se 16 ushtarë kishin humbur jetën dhe nëntë të tjerë ishin plagosur. Ajo gjithashtu tha se trupat e saj kishin vrarë rreth 50 militantë gjatë përplasjes me armë.
Incidenti ndodhi në jug të vendit, në rajonin Diffa që kufizohet me Nigerinë, qeveria e së cilës gjithashtu ka zhvilluar një luftë të zgjatur kundër grupit militant.
Rebelimi i Boko Haram, që filloi në Nigeri në vitin 2009, shpesh përhapet në vende të tjera.
Një sulm i dyshuar i kryer nga Boko Haram në dhjetor 2020 vrau 28 njerëz dhe 800 shtëpi u dogjën. Shifrat e OKB -së sugjerojnë se të paktën 36,000 kanë vdekur që kur grupi filloi fushatën e tij terroriste, duke zhvendosur rreth 2 milionë njerëz në Nigeri.
