Drejtuesja e sapozgjedhur e Sekretariatit për ish-të Përndjekurit Politikë në PD, Jonila Godole, është pyetur në “Neës 24” mbi rolin e saj dhe kauzën e ish-të përndjekurve por po ashtu për rolin që duhet të ketë tani e tutje ish-kryeministri Sali Berisha, sidomos pas ultimatumit vendosur nga amerikanët për të mos qenë pjesë e parlamentit.
“Vendimi i z. Berisha është vendim personal i tij. Çdo forcë politike tregon pjekurinë e vet pikërisht në këto lloj momentesh të rëndësishme. Kjo do ta çojë PD përpara ose jo, këto janë kosto që do t’i mbajnë ata. Unë kam thënë që bota ka treguar që dhe personalitete të mëdha, të cilët kanë qenë absolutisht të rëndësishëm për gjithë Evropën, ku kam sjellë në vëmendje rastin e ish-kancelarit gjreman Helmut Kohl, në një moment të caktuar partisë i është dashur të marrë një vendim, që të ndahej prej tij, por duke respektuar kontributin e tij deri në fund.
Këto janë vendime që i marrin partitë vetë. Këto janë modele që unë i kam sugjeruar.
Nëse mua do më pyesin sot nga brenda PD, patjetër që do ta sugjeroj këtë dhe do flas hapur. Por kjo është pjesë e PD, duhet të tregojë se është vërtet një parti që e meriton të vijë në pushtet. Unë shpresoj shumë që PD të bëjë zgjidhjen e tyre.”, theksoi Godole.
Lidhur me ish-të përndjekurit politike Godole tha se “për fat të keq nuk ka një forcë tjetër politike këtu, përveç PD-së, që të jetë shprehur hapur dhe qartë se ai regjim ka qenë kriminal.”
“Ai regjim ka qenë kriminal. Unë do mundohem që në pak vite të arrijmë të kemi një lloj paqeje, të kemi një transparencë të plotë për krimet e komunizmit dhe një kërkim faljeje reale”, u shpreh Godole.
