Partia Demokratike ka reaguar pas vetvrasjes së fermerit në Roskovec duke akuzuar qeverinë për situatën në të cilën ka vendosur bujqësinë.
Nënkryetari i PD-së Enkeljd Alibeaj nëpërmjet një postimi në rrjetet sociale thotë se fermeri ka kryer vetëvrasje pasi prodhimi i serave të tij shitej me çmim të ulët dhe nuk nxirrte fitime të mjaftueshme për të paguar kredinë.
Aliebaj shton se PD-ja ka denoncuar braktisjen e skemës së subvencioneve për fermerët duke favorizuar 2-3 oligarkë.
“Një fermer i ka dhënë fund jetës në Roskovec, sepse prodhimi i serave të tij shitej me çmim shumë të ulët, dhe kësisoj, nuk arrinte të nxirrte fitime të mjaftueshme për të paguar kredinë.
PD e ka denoncuar me forcë braktisjen e skemës së subvencioneve për fermerët, duke favorizuar 2-3 oligarkë importues që sjellin nga jashtë çdo produkt që fare mirë mund të ishte vendas.
Fermerët e kanë të pamundur të paguajnë këstet e kredisë çdo muaj, pasi prodhimet e tyre për shkak të rënies së konsumit dhe konkurrencës së pandershme që u bëhet me produkte importi, në shumicën e rasteve nuk shiten.
Fatkeqësi të tilla janë një kambanë alarmi për situatën në të cilën ndodhet sot ekonomia dhe bujqësia shqiptare. Në këtë ditë të vështirë, ne ndajmë dhimbjen me familjen e të ndjerit.
Zëri ynë në mbështetje të fermerëve ka qenë përherë i fortë, me propozime konkrete në mbështetje të njerëzve të punës që sakrifikojnë çdo gjë për të punuar ndershmërisht dhe për të dhënë kontributin e tyre në shoqërinë tonë. Zëri ynë në mbështetje të fermerëve do të jetë edhe më i fortë, që këto tragjedi të mos ndodhin më!”-shkruan Alibeaj.
