Një gjykatë në Bangladesh ka dënuar me vdekje gjashtë anëtarë të një grupi të jashtëligjshëm për vrasjen e dy aktivistëve LGBTQ+ pesë vjet më parë. Gjykatësi liroi dy të tjerë në lidhje me vrasjet.
Në një sallë të mbushur në kryeqytetin e vendit, Daka, gjykatësi Majibur Rahman i Gjykatës Speciale Kundër Terrorizmit vendosi që gjashtë nga tetë të akuzuarit do të vdisnin për krimet e tyre.
Vetëm katër nga tetë të akuzuarit ishin të pranishëm në gjykatë për dënimin. Dy të tjerë, përfshirë një ish-oficer të ushtrisë, u dënuan në mungesë, ndërsa të dyshuarit e mbetur u liruan.
Të gjashtë burrat u shpallën fajtorë për vrasjen brutale të dy aktivistëve LGBTQ+ në kryeqytetin Daka në vitin 2016. Xulhaz Mannan, redaktori i revistës së parë dhe të vetme të vendit për komunitetin homoseksual, u sulmua për vdekje së bashku me mikun e tij Rabi Tonoy.
Gjashtë vrasësit gjithashtu i përkisnin grupit Ansar al-Islam, një grup për të cilin zyrtarët thonë se është një degë e Al-Kaedës dhe u ndalua nga qeveria e Bangladeshit një vit para vrasjeve.
Pesë nga të dënuarit ishin dënuar tashmë me vdekje për vrasjet e një blogeri dhe një botuesi në vitin 2015. Gjykatësi tha se dënimi i së martës duhet të shërbejë si një shembull që Bangladeshi nuk do të tolerojë ‘militantizmin ose terrorizmin në asnjë formë’.
