‘Grupi për PD’-në ka kërkuar dorëheqjen e kreut të PD-së, Basha, lidhur me vendimin e tij për përjashtimin e Sali Berishës nga grupi parlamentar i kësaj force politike.
Në një deklaratë zytrtare për mediat, grupi thekson se vendimi është antistatutor dhe është vijim i vendimeve antistatutore të ndërmarra nga Basha që në vitin 2017.
Ata thonë se Basha është përgjegjës për humbjen e zgjedhjeve të 25 prillit nëpërmjet pazareve me kryeministrin Rama.
Grupi kërkon ringritjen e PD-së si parti e djathtë bashkëkohore me një projekt të ri si dhe përcakton hapat për këtë. Doëheqja ose largimi i Bashës është hapi i parë, që pasohet nga krijimi i një Këshilli Drejtues të Përkohshëm, kthimi i votës dhe mendimit të lirë si dhe ringritja e forumeve të partisë.
Deklarata
“Tiranë, 16 shtator 2021
Grupi për PD ka ndjekur me shqetësim zhvillimet e ditëve të fundit në Partinë Demokratike. Vendimi i fundit i Kryetarit në detyrë të Partisë Demokratike është antistatutor dhe në vazhdën e të gjitha vendimeve antistatutore e antidemokratike të ndërmarra që prej vitit 2017.
Lulzim Basha është përgjegjës për humbjen e zgjedhjeve të 25 prillit 2021 nëpërmjet pazareve dhe marrëveshjeve fitimprurëse me Edi Ramën, për përfitim personal. “Masakra zgjedhore” ishte alibia e rradhës për të mbuluar këto pazare. Për këto arsye dhe shumë të tjera, Partia Demokratike duhet të ringrihet dhe reformohet si një parti e djathtë bashkëkohore, me një projekt të ri të bazuar në idealet e themelimit të saj. PD-ja e marrë peng duhet ti kthehet demokratëve dhe anëtarësia e saj e gjerë dhe e pandikuar, e pakushtëzuar, duhet të vendosë mbi të ardhmen e saj. Dorëheqja ose largimi i Lulzim Bashës nga pozitat e Kryetarit në detyrë duhet të jetë akti i parë dhe i menjëhershëm drejt këtij reformimi. Krijimi i një Këshilli Drejtues të përkohshëm, kthimi i votës dhe i mendimit të lirë në parti, si dhe ringritja e të gjitha forumeve të PDSH-së nëpërmjet zgjedhjeve të lira, janë të domosdoshme për ringritjen e Partisë dhe kthimin e besimit. Reformimi i PD-së do të vijë nga bashkimi i të gjithë kontributeve dhe vlerave ndër vite, konkurenca e lirë dhe meritokracia në Parti. Ne vlerësojmë se Shqipëria ka më tepër se kurrë nevojë për një opozitë të fortë, të pakapur dhe të pandikuar dhe kjo bëhet vetëm me hapjen e Partisë dhe kthimin e institucionit të votës së lirë.”
