Biznesmeni italian Davide Pecorelli nuk vdiq në makinën e djegur në Pukë sikurse mendohej, por pas 8 muajsh u gjet i gjallë jashtë brigjeve të Montecristo-s dhe sot mediet e shtetit fqinj kanë zbuluar më shumë detaje mbi historinë misterioze.
Duket se gabimi që Pecorelli kishte bërë dhe që çoi në zbulimin e tij ishte aktivizimi i kartës së bankës mbrëmjen e së Dielës së kaluar në Romë.
Mediet italiane shkruajnë se ishte shoqëruesi shqiptar i Pecorellit (i ndihmuar nga avokati Giancarlo Viti), i cili raportoi alarmin e bankës tek hetuesit. Për hetuesit në Perugia, aktivizimi i kartës ishte provë se biznesmeni mund të ishte gjallë dhe tashmë ishte kthyer në Itali.
Më pas gjurmët e Pecorellit humbën përsëri.
Biznesmeni sipas gazetës italiane kishte dokumente të rreme. Ato i tregoi në hotelin Giglio të Mërkurën në mbrëmje, ku kërkonte të merrte me qira një gomone.
Policia pyjore e ishullit kreu një kontroll në dhomën e hotelit, sekuestroi dokumentin e falsifikuar dhe objekte të tjera. Se si Pecorelli arriti në Itali nga Shqipëria është ende një mister.
Gomonia e Pecorellit u gjet në vështirësi të Premten pasdite në brigjet e Giglio-s. Varka e patrullës e shpëtoi atë. Ai dukej si një njeri i braktisur: me flokë shumë të hollë, të pakrehur, të gjatë. Ai i tha ushtrisë se ai ishte Davide Pecorelli dhe se ai donte të fliste me prokurorin e Perugia-s, i cili kishte hetuar zhdukjen e tij që nga janari.
Dje në mëngjes ushtria e shoqëroi biznesmenin në Piombino dhe e identifikoi atë. Të hënën pasdite është caktuar një seancë ku Pecorelli do të dalë para zëvendës prokurorit Giuseppe Petrazzini dhe do të tregojë më shumë lidhur me inskenimin e vdekjes së tij.
