Sot është Dita Ndërkombëtare e Paqes, e me këtë rast kryeministri Edi Rama ka publikuar një mesazh ku shprehet se Shqipëria ka kontribuar dhe do të vazhdojë të japë kontributin e saj në misione paqeruajtëse.
Ai shprehet se kjo ditë na rikujton se ka më shumë gjëra që “na bashkojnë” sesa ato që mund të “na ndajnë”.
“Dita Ndërkombëtare e Paqes.
Si një vend anëtar në NATO, Shqipëria ka kontribuar dhe do të vazhdojë të japë kontributin e saj në misione paqeruajtëse anembanë globit, në rritjen e bashkëpunimit, sigurisë e tolerancës.
Kjo ditë na rikujton se ka më shumë gjëra që na bashkojnë sesa ato që mund të na ndajnë.
#KrenarpërShqipërinë.”– shkruan Rama.
Një mesazh vjen edhe nga Kryetarja e Kuvendit, Zonja Lindita e cila shprehet se vendi ynë kontribues i spikatur i paqes.
“Më 1981 Asambleja e Përgjithshme e OKB-së vendosi që 21 shtatori të kremtohet si Dita Ndërkombëtare e Paqes.
Sot, dyzetë vjet më pas, Shqipëria është bërë një kontribuese e spikatur e paqes dhe vazhdon të kontribuojë në rritjen e bashkëpunimit, sigurisë, tolerancës e mirëkuptimit në rajon e më gjerë.
Si një vend anëtar i NATO-s, Shqipëria ka dërguar djemtë dhe vajzat e saj në misione paqeruajtëse në mjaft vatra të nxehta luftrash e konfliktesh anembanë globit.
Vendi ynë përmbushi me mjaft sukses mandatin e Presidencës së OSBE-së gjatë vitit të vështirë 2020, kur tensioneve e problemeve të krijuara nga luftrat e konfliktet, iu shtua edhe pandemia e Covid -19.
Gjatë dy viteve të ardhshme, 2022-2023, Shqipëria do të kontriboujë për paqen e sigurinë në botë, jo vetëm nëpërmjet shembullit, por edhe me vendim-marrjet e saj si anëtare jo e përhershme e Këshillit të Sigurimit të OKB-së.
Paqja në botë nis nga paqja në çdo vend. Ajo arrihet më lehtë, kur të gjithë kombet përparojnë e zhvillohen, rrisin mirëqënien dhe ofrojnë mundësi e të drejta të barabarta për të gjithë qytetarët, pavarësisht bindjeve politike, përkatësisë etnike e fetare, moshës, gjinisë, origjinës apo gjendjes ekonomike.
Shqipëria është një vend i vogël, por partneriteti strategjik me aleatët tanë të mëdhenj, ShBA dhe BE, si edhe kontributi për sigurinë e paqen, për buzëqeshjen e lumturinë e fëmijëve e qytetarëve të të gjithë botës, na bëjnë një vend të madh.”- shkruan kryeparlamentarja Nikolla.
