Teatri Kombëtar i Operas dhe Baletit ka reaguar pas deklaratave të sopranos Inva Mula, e cila është shorehur se nuk kishte marrë një ftesë zyrtare për të qenë pjesë në mbrëmjen Gala të Inaugurimit të rikonstruksionit të godinës së këtij institucioni.
TKOB pretendon se Inva Mulës i janë dërguar disa herë ftesat zyrtare për të marrë pjesë në mbrëmjen gala, nëpërmjet Drejtoreshës Artistike, Abigeila Voshtina.
Sipas këtij institucioni, ftesa zyrtare është përsëritur tre herë, duke filluar nga data 11 nëntor 2019, dhe ftesa është ripërsëritur pasi planet për inaugurimin u shtynë “për shkaqe madhore si: tërmeti i nëntorit 2019 dhe më pas situata Covid 19”.
TKOB ka publikuar mesazhet dhe email-et e dërguara në tre periudha të ndryshme. I fundit është dërguar në adresë të sopranos më 19 korrik të këtij viti, por theksohet se sopranoja “deri më tani nuk ka kthyer asnjë përgjigje”.
Kujtojmë se pak ditë më parë deklarata e sopranos Inva Mula se ajo nuk kishte marrë një ftesë zyrtare për pjesëmarrjen në programin artistik bëri shumë bujë.
“Sigurisht që nuk do jem e pranishme, them sigurisht sepse nuk jam e ftuar. Po, kam një ftesë si spektatore, por nuk më është bërë asnjë ftesë zyrtare. Nuk është shfaqur dëshirë, ka qenë një dëshirë e zbehtë e drejtoreshës artistike, por që nuk ka pasur domethënë një bashkëbisedim të vërtetë për një pjesëmarrje të tillë. Megjithatë, nuk ka asnjë rëndësi. Ka rëndësi që ky teatër jo vetëm të hapet por ky teatër të ketë kalendarin e vet, të ketë një programacion dinjitoz jo atë që ka pasur deri sot, që arti shqiptar me artistët e vet të jetë gjithmonë pararojë e shoqërisë sonë.”- ishin fjalët e sopranos gjatë një prononcimi për “News 24”.
DEKLARATA ZYRTARE E TKOB
Në respekt të ndjekësve fanatik të TKOB, publikut të gjerë, artistëve dhe medias, ju informojmë në lidhje me të vërtetën e ftesave zyrtare, të cilat ju janë bërë artistëve ekselentë shqiptar, për pjesëmarrjen në programin e Mbrëmjes Gala të Inaugurimit të Rikonstruksionit të TKOB.
TKOB nëpërmjet Drejtoreshës Artistike, znj. Abigeila Voshtina, ashtu si të gjithë artistëve shqiptar ekselentë, i ka dërguar edhe znj. Inva Mula ftesat zyrtare për pjesëmarrjen në programin artistik të Mbrëmjes Gala të Inaugurimit të Rikonstruksionit të TKOB.
Këto ftesa zyrtare, janë përsëritur tre herë, duke filluar nga data 11 NËNTOR 2019, pasi TKOB ka patur në planet e veta që atëherë realizimin e Mbrëmjes Gala të Inaugurimit, plane të cilat janë shtyrë për shkaqe madhore si: tërmeti i nëntorit 2019 dhe më pas situata Covid 19.
Më poshtë gjeni tre email-et e dërguara në tre periudha të ndryshme, që përkojnë me parashikimet tonë të rihapjes së teatrit. Email-i i fundit zyrtar nga Drejtoresha Artistike e TKOB, znj. Abigeila Voshtina është dërguar në adresë të znj. Inva Mula në 19 KORRIK të vitit 2021 me shpresën që ajo do të kishte mundësi të merrte pjesë në Mbrëmjen Gala, por deri më tani nuk ka kthyer asnjë përgjigje.
Sqarojmë gjithashtu se një muaj përpara ftesës së fundit zyrtare të bërë nga Drejtoresha Artistike, znj. Voshtina (në email-in e datës 19 KORRIK 2021), Drejtoresha e Përgjithshme e TKOBAP-së, znj. Zana Çela i ka dërguar në datë 14 QERSHOR 2021 një mesazh shoqëror në WhatsApp, znj.Mula, por edhe në këtë rast nuk ka patur asnjë përgjigje. Më poshtë gjeni të renditur sipas datave ftesat zyrtare në email dhe mesazhin.
Mendojmë se përtej këtyre fakteve nuk mund të ketë më vend për keq interpretime.
