Kryeministri i Kosovës Albin Kurti ka reaguar lidhur me situatën e tensionuar në veri të vendit.
Sipas tij, zjarret në Qendrat e Regjistrimit në Zubin Patok dhe në Zveçan janë të qëllimshme. Ai shprehet se tensionet janë duke u nxitur nga Serbia, dhe se sulme të tilla nuk do të tolerohen nga policia e Kosovës.
“Hetimet preliminare tregojnë që djegia e ndërtesës së Qendrës së Regjistrimit të Automjeteve në Zubin Potok nuk ishte aksidentale por e qëllimshme. Edhe në Zveçan kanë hedhur dy bomba dore, po ashtu në ndërtesën e qendrës së njëjtë për regjistrimin e automjeteve, por ato fatmirësisht nuk kanë eksploduar. Individë ose grupe të cilave sundimi i ligjit dhe rendi e siguria publike ua rrezikon aktivitetin kriminal po e sulmojnë shtetin tonë dhe po e cenojnë paqen.
Qartazi ata po i nxit e mbështet Serbia, përkatësisht regjimi autokrat atje. Fatkeqësisht, para syve të bashkësisë ndërkombëtare, Serbia po përdorë qytetarë të Kosovës për të provokuar konflikt serioz ndërkombëtar.
Sulmet e këtilla zjarrvënëse dhe kriminelët që i bëjnë ato nuk do të tolerohen. Policia e Kosovës është institucion profesional që duhet respektuar nga të gjithë.”- shkruan Kurti.
Më pas ai ka edhe një thirrje për qytetarët e Kosovës, që të mos provokojnë e mos bien pre e provokimeve: “U bëj thirrje qytetarëve, sidomos në veri të Ibrit, pavarësisht a janë serbë, shqiptarë, boshnjakë apo romë, që ta ruajnë qetësinë dhe të bashkëpunojnë me institucionet e Kosovës.”
