Kompania “Pfizer” ka njoftuar të hënën se ka filluar testimet e një ilaçi antiviral oral për parandalimin e COVID-19 tek njerëzit që janë ekspozuar ndaj virusit.
Për studimin do të marrin pjesë rreth 2,660 pjesëmarrës të rritur të shëndetshëm të moshës 18 vjeç e lart, që banojnë në të njëjtën familje me një person të konfirmuar me COVID-19.
Siç shkruan Reuters, ilaçi eksperimental është krijuar për të bllokuar aktivitetin e një enzime kryesore të nevojshme për përhapjen e virusit dhe do të administrohet së bashku me një dozë të ulët me ritonavir, një ilaç i përdorur gjerësisht në trajtimet e kombinuara për infeksionin HIV.
Pfizer tha se në mënyrë specifike e kishte krijuar ilaçin për t’u marrë me gojë “në mënyrë që potencialisht të mund të përdoret që në shenjat e para të infeksionit ose në vetëdijen e parë për një ekspozim, pa kërkuar që pacientët të shtrohen në spital”.
Deri më tani, i vetmi trajtim antiviral i miratuar për COVID-19 në Shtetet e Bashkuara është ilaçi intravenoz remdesivir i Gilead Sciences, të cilin ish-Presidenti Donald Trump e mori në kombinim me dexamethasone kur u infektua me COVID-19 vjeshtën e kaluar.
“Me ndikimin e vazhdueshëm të COVID-19 në të gjithë botën, ne besojmë se trajtimi i virusit do të kërkojë trajtime efektive për njerëzit që kontraktojnë ose janë ekspozuar ndaj virusit, duke plotësuar ndikimin që vaksinat kanë pasur në ndihmën për të shuar infeksionet.”- tha Mikael Dolsten, zyrtari kryesor shkencor dhe presidenti i Kërkimit, Zhvillimit dhe Mjekësisë në Botë në kompaninë Pfizer.
Pfizer, së bashku me kompanitë rivale Merck & Co dhe Roche Holding AG, kanë garuar për të krijuar një pilulë antivirale të lehtë për t’u administruar për koronavirusin.
