Deri në 3,200 priftërinj katolikë kanë abuzuar seksualisht me fëmijët në Francë në historinë e kohëve të fundit, ka thënë kreu i një hetimi të pavarur, disa ditë para publikimit të një raporti mbi shtrirjen e krimeve kundër të miturve brenda kishës.
Komisioni i pavarur i udhëhequr nga ish-nënkryetari i Këshillit të Shtetit, Jean-Marc Sauve, u krijua nga Kisha Katolike Franceze në 2018 për të studiuar krimet seksuale kundër të miturve brenda radhëve të saj.
Pas kalimit nëpër arkivat e kishave në të gjithë vendin dhe kryerjes së intervistave, komisioni, i njohur me shkurtesën CIASE, do të japë një raport prej 2.500 faqesh të martën.
Sauve i tha AFP se ekipi i tij kishte zbuluar midis 2,900 dhe 3,200 priftërinj pedofilë dhe anëtarë të tjerë të kishës që kanë vepruar që nga viti 1950. Ai shtoi se ky është ishte ‘një vlerësim minimal’.
“Gjëja më e tmerrshme për mua ishte të shihja të këqijat më absolute – një sulm ndaj integritetit fizik dhe mendor të fëmijëve – që do të thotë një vepër vdekjeje e kryer nga njerëz, misioni i të cilëve ishte të sillnin jetë dhe shpëtim.”
“Midis viteve 1950 dhe 1970, kisha ishte plotësisht indiferente ndaj viktimave. Ato nuk ekzistonin, vuajtjet e fëmijëve u injoruan,” tha Sauve për Le Journal du Dimanche të shtunën, duke shtuar se klerikët ishin shumë të interesuar në mbrojtjen e kishës dhe mbajtjen e shkelësve.
Radio Europe 1 citoi burime duke thënë se numri i vlerësuar i viktimave të mundshme të përmendura në raport do të jetë mbi 100,000. Kjo është 10 herë më e lartë se vlerësimi i mëparshëm i paraqitur nga komisioni në mars.
