Një politikan shqiptar rezulton të jetë pjesë e skandalit “Pandora Papers”, ku një rrjet gazetarësh investigativë zbuluan mijëra dokumente se si liderë botërorë dhe miliarderë kanë fshehur pasuritë në parajsa fiskale.
Marrëveshjet sekrete dhe asetet e fshehura të disa prej njerëzve më të pasur dhe më të fuqishëm në botë janë zbuluar në portalin e Konsorciumit ndërkombëtar të gazetarëve investigativë (ICIJ).
I quajtur “Pandora Papers”, investigimi përfshin 11.9 milion skedarë nga kompani të punësuara nga klientë të pasur për të krijuar struktura në det të hapur në parajsat tatimore si Panamaja, Dubai, Monako, Zvicra dhe Ishujt Kajman.
Nga kërkimi në këtë sajt, rezulton gjithashtu një politikan shqiptar dhe 13 kompani, me pronarë në Shqipëri.
Por emri i politikanit shqiptar që ka fshehur pasuritë në offshore nuk dihet.
Konsorciumi ndërkombëtar i gazetarëve investigativë (ICIJ) dhe një grup prej 150 mediash zbuluan se 336 zyrtarë publikë në të gjithë botën kanë lidhje me llogaritë offshore.
Mes emrave të përfshirë janë ish-kryeministri britanik Tony Blair, presidenti rus Vladimir Putin, kryeministri çek Babis, presidenti ukrainas, Mbreti i Jordanisë, dhe disa liderë të tjerë botërorë. Po ashtu vihen re edhe emra të muzikës si Shakira.
Llogaritë offshore shpesh herë janë përdorur për të menaxhuar në mënyrë sekrete dhe për të lëvizur shuma të mëdha parash me qëllim që të fshehin pasurinë e vërtetë të personit.
Dokumentat e ekzaminuara tregojnë shtrirjen, në të cilën operacionet sekrete offshore kanë prekur politikat financiare globale. Ministrat e financave të Pakistanit, Holandës dhe Brazilit kanë të gjithë lidhje me kompanitë offshore, ashtu si edhe ministrat e mëparshëm të financave të Maltës dhe Francës duke përfshirë edhe ish-shefin e FMN-së, Dominique Strauss-Kahn.
Zyrtarët e lartë fshehin asete në kompani dhe truste të fshehta ndërkohë që qeveritë e tyre përkatëse bëjnë pak për të ndaluar qarkullimin global të parave ilegale duke pasuruar kriminelët dhe varfëruar vendet./Hashtag.al
