Baza Britanike e Inteligjencës thuhet se është e lidhur me vrasjen e Shefit të Gardës Revolucionare Qasem Soleimani. Gjenerali u vra në një sulm ajror amerikan të urdhëruar nga ish-presidenti amerikan Trump në janar 2020 në Bagdad. Vrasja shkaktoi zemërim në Iran, me Teheranin që e shpalli atë një akt të terrorizmit shtetëror.
Oficeri i lartë ushtarak iranian Qasem Soleimani mund të jetë vrarë duke përdorur informacionin e siguruar nga baza e inteligjencës ‘Menwith Hill’ në Mbretërinë e Bashkuar në Yorkshire, sipas The Guardian, duke cituar një raport hetimor nga Barnaby Pace.
Hulumtimi gjithashtu vë në dyshim nëse personeli britanik në vend ishte i përfshirë duke ndihmuar sulmet vdekjeprurëse të dronëve amerikanë, veçanërisht në Pakistan, Somali dhe Jemen.
Pace argumenton në raportin e tij se forcat britanike dhe amerikane ‘veprojnë përtej kontrollit publik dhe llogaridhënies’, duke sugjeruar se ‘sistemet e vëzhgimit Orwellian dhe ekzekutimet jashtëgjyqësore të ekspozuara në vitet e fundit ka të ngjarë të vazhdojnë’, nëse diçka nuk ndryshon.
Teknikisht, ‘Menwith Hill’ është një bazë RAF, por gjithashtu operohet nga Agjencia Kombëtare e Sigurisë e SHBA (NSA), dhe ka 600 personel amerikan dhe 500 civilë britanikë në vend, sipas ‘The Guardian’.
Më parë, dokumentet e zbuluara nga sinjalizuesi i NSA Edward Snoëden thanë se ‘Menwith Hill’ është pjesë e një rrjeti të madh spiunazhi me aftësinë për të grumbulluar të dhëna nga qindra miliona e-mail dhe telefonata çdo ditë. Informacioni i mbledhur mund të përdoret në operacionet të ndryshme sekrete.
Mes shqetësimeve të shprehura në lidhje me vrasjen e Soleimanit dhe përfshirjen e supozuar britanike, një zëdhënës i Ministrisë së Mbrojtjes në Mbretërinë e Bashkuar u shpreh.
“RAF Menwith Hill është pjesë e një rrjeti mbarëbotëror të komunikimeve të mbrojtjes amerikane, me bazën që mbështet një sërë aktivitetesh komunikimi.” – tha zëdhënësi për The Guardian.
Vrasja e Qasem Soleimanit, i cili besohej se ishte personi i dytë më i fuqishëm i Iranit, ndodhi në janar 2020, kur gjenerali ishte në kryeqytetin irakian, Bagdad, me qëllim për t’u takuar me kryeministrin irakian Adil Abdul-Mahdi.
Ish-presidenti amerikan Donald Trump autorizoi sulmin fatal me dron që mori jetën e katër shtetasve të tjerë iranianë – në mesin e tyre komandanti i milicisë Kata’ib Hezbollah, Abu Mahdi al -Muhandis.
Ndërsa Uashingtoni e justifikoi vrasjen, duke thënë se Soleimani përbënte një ‘kërcënim’, Teherani e dënoi sulmin si një ‘akt të terrorizmit shtetëror’, duke kryer më vonë sulme ajrore hakmarrëse në bazat ushtarake amerikane në Irak.
