Ministria e Jashtme Ruse ka reaguar pas deklaratës së kryeministrit Rama se një nga aspiratat e tij është bashkimi i Shqipërisë me Kosovën.
Zëdhënësja e Ministrisë së Jashtme Maria Zakharova e ka konsideruar të papranueshme deklaratën e kryeministrit Rama dhe thotë se ideja e Shqipërisë së Madhe minon stabilitetin në rajon.
“Ne e konsiderojmë deklaratën e kryeministrit shqiptar Edi Rama për bashkimin e Shqipërisë me Kosovën plotësisht të papranueshme. Promovimi i planeve për krijimin e një ‘Shqipërie të Madhe’ bie ndesh plotësisht me Rezolutën 1244 të Këshillit të Sigurimit të OKB -së dhe minon stabilitetin në rajon.
Është veçanërisht e çuditshme të dëgjosh një udhëheqës të një vendi ballkanik që deklaron shkeljen e një dokumenti që është themeli i zgjidhjes së Kosovës, si një qëllim kryesor të karrierës së tij politike. Kjo lloj deklarate e pavend nuk përshtatet në kontekstin e përpjekjeve të përbashkëta të Beogradit dhe Tiranës për të krijuar një treg të përbashkët nën nismën rajonale të Ballkanit të Hapur të ndjekur në bashkëpunim me Shkupin.
Shpresojmë të shohim një përgjigje adekuate nga kuratorët perëndimorë të projektit të ‘shtetësisë’ së Kosovës ndaj këtij provokimi të pacipë. Ne jemi jashtëzakonisht të befasuar që ata po i lënë këto lloj thirrjesh përçarëse për veprim, ndërsa sulmojnë Beogradin për konceptin e tij të justifikuar humanitar të Botës Serbe që nuk bie ndesh me të drejtën ndërkombëtare.”- ka deklaruar Zakharova.
Gjatë intervistës së para pak ditëve në emisionin “Zonë e Lirë”, Rama u pyet nëse synimi i tij është të jetë president i Shqipërisë dhe Kosovës.
Ai u përgjigj : “Nuk është në planet e mia. Bashkimi Kosovës me Shqipërinë po. Kjo nuk është projekt personal, kjo është aspiratë. Ambicia ime është të kem një jetë të tretë, që të mos ketë lidhje me politikën e përditshme”.
