Kryeministri grek, Kyriakos Mitsotakis ka marrë këtë të martë dozën e tretë të vaksinës anti-COVID.
Gjatë fjalimit të tij nga qendra e vaksinimit Mega “Prometheus”, ai u bëri thirrje të gjithë qytetarëve grekë që të bëjnë dozën përforcuese.
“Sapo kam përfunduar dozën e tretë të vaksinës Covid-19, duke ndjekur udhëzimet e ekspertëve. Dhe unë do t’u kërkoja të gjithëve të bëjnë të njëjtën gjë, në lidhje me dozën e tretë ose kryesisht në lidhje me ata që ende nuk janë vaksinuar. Sepse tani të dhënat janë aq të theksuara sa nuk lejojnë asnjë dyshim për efektivitetin dhe sigurinë e vaksinës.
Nëntë nga dhjetë bashkëqytetarët tanë që janë akoma të intubuar sot janë të pavaksinuar dhe një numër shumë i madh i bashkëqytetarëve tanë që humbin jetën çdo ditë janë gjithashtu të pavaksinuar.
Le t’i dëgjojmë më në fund shkencëtarët. Le të shohim të dhënat e vërteta. Le të nxitojmë të gjithë të vaksinohemi në mënyrë që të rrisim më tej normat e vaksinimit në vendin tonë. Për të mbrojtur para së gjithash veten, ata që duam dhe shoqërinë në tërësi.”- shprehet kryeministri grek.
Pas vaksinimit, Mitsotakis pati një bisedë të shkurtër me Zëvendësministrin e Krizës Klimatike dhe Mbrojtjes Civile Evangelos Tournas dhe Sekretarin e Përgjithshëm të Mbrojtjes Civile Vassilis Papageorgiou. Ata diskutuan për përgatitjen në funksion të fenomeneve intensive të motit që priten në ditët në vijim.
