Ish-presidenti amerikan Bill Clinton ka dalë nga spitali ku ishte shtruar në Kaliforni, pasi u trajtua për një infeksion që ishte përhapur në qarkullimin e tij të gjakut.
Siç raporton CNN, ish-presidenti doli krah për krah me gruan e tij dhe ish-Sekretaren e Shtetit Hillary Clinton.
Ai përshëndeti stafin e bluzave të bardha dhe tha se ndihej mirë.
Drejtori Ekzekutiv i Departamentit të Mjekësisë të Universitetit të Kalifornisë Dr. Alpesh N. Amin, i cili kishte mbikëqyrur ekipin mjekësor, nxorri një deklaratë pas daljes së Clinton-it nga spitali.
“Presidenti Clinton u lirua nga Qendra Mjekësore UC Irvine sot. Ethet dhe numërimi i qelizave të bardha të gjakut janë normalizuar dhe ai do të kthehet në shtëpi në Nju Jork për të përfunduar kursin e tij të antibiotikëve. Në emër të të gjithëve në Qendrën Mjekësore UC Irvine, ne ishim të nderuar që e trajtuam atë dhe do të vazhdojmë të monitorojmë përparimin e tij.”- deklaroi mjeku.
Clinton ishte shtruar në spital që javën e kaluar për një infeksion të traktit urinar që u përhap në qarkullimin e tij të gjakut. Sipas mjekëve të tij, ai ishte trajtuar në Kujdes intensiv për privatësinë dhe sigurinë e tij, por jo sepse ai kishte nevojë për kujdes intensiv.
