Barbados ka zgjedhur sot presidenten e saj të parë ndonjëherë ndërsa përgatitet të kthehet në republikë, duke hequr Mbretëreshën Elizabeth si kreun e shtetit.
Sikurse shkruan BBC, 72-vjeçarja Dame Sandra Mason, do të betohet në 30 Nëntor, kur do të shënohet edhe 55-vjetori i pavarësisë së vendit nga Britania.
Me një popullsi prej rreth 285 000 njerëzish, Barbados është një nga ishujt më të populluar dhe më të begatë të Karaibeve. Dikur e varur shumë nga eksportet e sheqerit, ekonomia e vendit është diversifikuar në turizëm dhe financa.
Barbados nuk do të jetë e para ish-koloni britanike në Karaibe që do të bëhet republikë. Guajana e bëri atë hap në vitin 1970, më pak se katër vjet pasi fitoi pavarësinë nga Britania. Trinidad dhe Tobago ndoqën gjithashtu shembullin në vitin 1976 dhe Dominica në 1978.
Gruaja e parë që shërbeu në Gjykatën e Apelit në Barbados, Dame Sandra ka qenë guvernatore e përgjithshme që nga viti 2018.
Qeveria njoftoi planin për të kaluar në republikë vitin e kaluar duke thënë se “kishte ardhur koha” që Barbados të “linte plotësisht të kaluarën koloniale pas”.
