Pas përpjekjeve të dështuara për të rinovuar një kontratë afatgjatë për gazin nga Rusia në Moldavi, e cila po vuan nga mungesat, Gazprom ka njoftuar se dërgesat mund të ndalen muajin e ardhshëm nëse vendi nuk paguan borxhin.
Kompania thotë se qeveria e Moldavisë ka krijuar krizën e furnizimit me gaz në të cilën ndodhet vendi tani dhe se borxhi total i Moldavisë aktualisht është 709 milionë dollarë.
Sidoqoftë, Gazprom këmbënguli se situata nuk ka të bëjë me politikën, pasi kompania nuk mund të përballojë të funksionojë me humbje.
Moldavia shpalli gjendjen e jashtëzakonshme të premten për shkak të mungesës së gazit natyror. Kriza u shpalos mes çmimeve rekord të larta dhe pasi një kontratë e vitit 2008 me Gazprom të Rusisë përfundoi në shtator.
Dërgesat vazhduan gjatë tetorit, por palët nuk arritën të bien dakord për kushtet për zgjatjen e kontratës.
Më herët të shtunën, zëvendëskryeministri i Moldavisë Andrei Spinu, i cili drejtoi delegacionin e gazit të vendit të tij në Moskë, raportoi një mungesë progresi në negociata. Pala ruse kërkoi ‘kushte financiare dhe jo-financiare, përfshirë shlyerjen e borxhit historik’, tha ai në një postim në Facebook, duke pretenduar se kostoja e çështjes ishte ‘më e lartë se ofertat në tregjet ndërkombëtare të gazit’.
