Një tregtar fruta-perimesh që ushtron aktivitetin e tij në qytetin e Elbasanit, ka denoncuar sot dhunën e efektivëve të Policisë së Rendit të Komisariatit të Lushnjës.
Në një prononcim për “SyriTV”, Amarildo Hoxha u shfaq me shenja dhune e fraktura të rënda në fytyrë e në kokë.
Hoxha ka treguar se ngjarja ka ndodhur në orët e para të mëngjesit, në autostradën Fier-Lushnjë, kur ai ka qenë duke u kthyer nga furnizimi me fruta perime që kishte kryer në Fier për biznesin e tij.
Qytetari tha se është ndaluar për kontroll në autostradë dhe është dhunuar barbarisht nga dy efektivë të cilëve nuk ua di emrat. Hoxha tha për “Syri TV” se fillimisht i janë kërkuar dokumentet, leja e qarkullimit dhe patenta, por efektivi është acaruar kur ka parë që Hoxha ishte “live” në rrjetet sociale përmes celularit të tij. Ai thotë se ka refuzuar të ndërpresë videon, gjë që sipas tij bëri që një nga policët ta godiste me grushte. Vetëm pas disa orësh qëndimi në komisariat, Hoxha është marrë nga prindërit e tij dhe është dërguar në spital për mjekim.
Lidhur me këtë denoncim, nuk ka vonuar përgjigja zyrtare nga Policia, e cila thotë se qytetari Amarildo Hoxha nuk ka pranuar që të japë kartë identifikimi, madje ka fyer dhe kanosur për jetën efektivët.
“Rreth orës 04:40 të mëngjesit të datës 24.10.2021, kanë ndaluar mjetin me targa AA 935 CR ( me drejtues të identifikuar më pas si shtetasi A. H., 28 vjeç, banues në Drenovicë, Berat), i cili ka refuzuar të japë dokumentet e identifikimit, duke fyer dhe kanosur për jetën efektivët e Policisë.
Shërbimet e Policisë kanë bërë shoqërimin forcërisht të shtetasit A. H., në Komisariatin e Policisë Lushnjë.“- thuhet në reagimin e policisë.
Po ashtu thuhet se në lidhje me rastin, ka nisur edhe një hetim disiplinor nëse ka tejkalim të kompetencave të policisë.
REAGIMI I POLICISË
Në lidhje me pretendimet e shtetasit A. H., të bëra publike në media, ku akuzon punonjësit e Policisë Lushnjë, për dhunë të ushtruar ndaj tij, sqarojmë opinionin publik se:
Në kuadër të masave të marra për kapjen e autorëve të vrasjes së ndodhur në orët e mbrëmjes së datës 23.10.2021, në qytetin e Fierit, shërbimet e Komisariatit të Policisë Lushnjë kishin ngritur pikë kontrolli në vendin e quajtur “Rotondo e Savrës”, Lushnjë.
Rreth orës 04:40 të mëngjesit të datës 24.10.2021, kanë ndaluar mjetin me targa AA 935 CR ( me drejtues të identifikuar më pas si shtetasi A. H., 28 vjeç, banues në Drenovicë, Berat), i cili ka refuzuar të japë dokumentet e identifikimit, duke fyer dhe kanosur për jetën efektivët e Policisë.
Shërbimet e Policisë kanë bërë shoqërimin forcërisht të shtetasit A. H., në Komisariatin e Policisë Lushnjë.
Duke qenë se edhe shërbimet e Policisë edhe shtetasi i shoqëruar kanë patur pretendimet respektive, është njoftuar Prokuroria e Rrethit Gjyqësor Lushnjë, e cila ka vënë në dispozicion një oficer të Policisë Gjyqësore të Prokurorisë, për të kryer veprimet.
Nga ana e oficerit të Policisë Gjyqësore të Prokurorisë janë administruar kallëzimet e punonjësve të Policisë, kallëzimi i shtetasit A. H., këqyrja dhe vendimi i ekspertimit mjeko-ligjor për shtetasin A. H.
Në përfundim të veprimeve procedurale, oficeri i Prokurorisë së Rrethit Gjyqësor Lushnjë ka komunikuar me Sallën e Komandimit pranë Komisariatit të Policisë Lushnjë, për të komunikuar veprimet hetimore dhe hetimin e këtij personi në gjendje të lirë.
Në lidhje me këtë rast, Drejtori i Përgjithshëm i Policisë së Shtetit ka urdhëruar Drejtorinë e Standardeve Profesionale, për të dërguar një grup pune në Komisariatin e Policisë Lushnjë, me qëllim verifikimin e rastit dhe nisjen e hetimit disiplinor në rast se konstatohet tejkalim i kompetencave të punonjësve të Policisë në kryerjen e detyrës.
Policia e Shtetit është e angazhuar maksimalisht për të luftuar krimin dhe për t’u ofruar qytetarëve një shërbim sa më cilësor dhe në këtë kuadër nuk do të tolerojë asnjë punonjës policie që do abuzojë me detyrën, dhe me forcën e ligjit do veprojë ndaj çdo individi që cenon ligjin apo integritetin fizik të punonjësve të Policisë./ Hashtag.al
