Kryeministri polak Mateusz Morawiecki ka paralajmëruar BE-në që të mos veprojë ‘duke i vënë armën në kokë Polonisë’ duke thënë se Varshava do e mbrojë veten me çdo mjet në dispozicion, nëse BE-ja fillon një ‘Luftë të Tretë Botërore’ duke frenuar fondet e rimëkëmbjes Covid-19.
Deklarata e formuluar fort erdhi pasi Komisioni Evropian kërcënoi se do ta linte Poloninë pa miliarda grante dhe hua si përgjigje ndaj një vendimi të diskutueshëm nga Gjykata Kushtetuese e vendit, e cila u dha përparësi ligjeve kombëtare mbi ato të Gjykatës Evropiane të Drejtësisë (GJED).
“Çfarë do të ndodhë nëse Komisioni Evropian fillon një Luftë të Tretë Botërore? Ne do të mbrojmë të drejtat tona me çdo armë që kemi në dispozicionin tonë.” – tha Morawiecki, i pyetur nga ‘Financial Times’ nëse Polonia tani mund të vërë veton ndaj legjislacionit të rëndësishëm si paketa historike e BE-së për klimën.
“Ne mendojmë se kjo tashmë është diskriminuese dhe një qasje diktatoriale nga Brukseli. Por nëse do të bëhet edhe më keq, ne do të duhet të mendojmë përmes strategjisë sonë.” – shtoi ai.
Kryeministri e përshkroi ndalimin nga Komisioni Evropian të grantit prej 36 miliardë eurosh për rindërtimin pas pandemisë si një ‘shkelje të sundimit të ligjit’ dhe tha se polakët nuk do të ‘dorëzoheshin’. Për të gjetur një kompromis, shtoi ai, BE duhet të kthejë vendimin e saj të fundit për të gjobitur Varshavën për çdo ditë derisa të zbatojë vendimet e GJED në lidhje me reformën e saj gjyqësore.
“Kjo do të ishte gjëja më e mençur që ata mund të bëjnë sepse ne nuk mund të flasim me njëri -tjetrin me armë në kokë.” – tha ai.
Morawiecki megjithatë i përmblodhi bisedimet e tij të fundit me liderët e BE-së, duke përfshirë kancelaren gjermane në largim Angela Merkel, presidentin francez Emmanuel Macron dhe shefen e Komisionit Evropian Ursula von der Leyen, si ‘shumë të kënaqshme’ dhe deklaroi se, pavarësisht mosmarrëveshjes së lartpërmendur, atje nuk kishte rrezik për ‘Polexit’.
Muajin e kaluar, Gjykata Kushtetuese polake vendosi se disa dispozita të traktateve të BE-së bien ndesh me ligjet polake dhe se institucionet evropiane po vepronin ‘përtej fushëveprimit të kompetencave të tyre’.
Lëvizja për t’i dhënë përparësi ligjeve kombëtare mbi ato evropiane shkaktoi tension në Bruksel. Disa figura, mes tyre Macron, kryeministri holandez Mark Rutte dhe presidenti i Parlamentit Evropian David Sassoli, kërkuan që Polonia të ndëshkohej, ndërsa të tjerë, përfshirë Merkelin, bënë thirrje për një kompromis.
