Partia Demokratike ka vijuar me akuzat ndaj sekretarit të Përgjithshëm të PS-së, ish-ministrit Damian Gjiknuri.
Sekretari i Përgjithshëm i PD-së, Gazment Bardhi ka publikuar sot një video, në të cilën ripërsërit akuzat se ish-ministri Gjiknuri ka udhëtuar mbi 15 herë me biznesmenët e inceneratorëve jashtë Shqipërisë.
“Afera 400 milionë euroshe e mafies së plehrave është një nga shpërdorimet më të mëdha të taksave të qytetarëve shqiptarë.
Ditën e djeshme Partia Demokratike zbuloi një tjetër zgjatim të kësaj afere të pisët, nëpërmjet faktimit të lidhjeve të ngushta të Mirel Mërtirit dhe Klodian Zotos, bosëve të inceneratorëve, dhe Damian Gjiknurit, i cili ka udhëtuar mbi 15 herë me ta jashtë Shqipërisë, ndërkohë që i gjithë aparati shtetëror ishte vendosur në gatishmëri të mafies së plehrave.
Ky konflikt i pastër interesi i shtohet numrit të madh të provave që Partia Demokratike ka grumbulluar vitet e fundit mbi këtë aferë që bën bashkë drejtuesit më të lartë të këtij pushteti të korruptuar, e sigurisht vet Edi Ramën, që ka promovuar dhe mbrojtur këto projekte që shkrumbojnë vetëm taksat e qytetarëve.”- shkruan Bardhi.
Sekretari i Përgjithshëm i PD-së, thotë se tani është radha e drejtësisë të thotë fjalën e saj mbi këtë aferë: “Tani është radha e drejtësisë të thotë fjalën e saj mbi këtë aferë 400 milionshe, që tregon edhe njëherë urgjencën që ka Shqipëria të pastrohet nga politikanët e korruptuar dhe të largoi këtë regjim plaçkitësish.”
