Deputetja e PD-së Albana Vokshi ka kundërshtuar nismën e kreut të partisë Basha për organizimin e zgjedhjeve në Lidhjen Demokratike të Gruas.
Vokshi shkruan se ndërhyrja e Bashës duke krijuar procedura sipas dëshirës e në shkelje të statutit janë dhunim arrogant i punës së strukturave të LDG-së.
Ajo thekson më tej se LDG-ja është në përfundim të procesit të anëtarësimeve, organizimit e zgjedhjes bazuar në statusin e saj, pjesë e së cilës është edhe procesi për zgjedhje e drejtueseve të LDG-së në të gjitha degët e vendit dhe në krye të institucionit.
Vokshi bën me dije se zgjedhjet në LDG bëhen nga vetë forumi sipas parimeve statutore dhe se as kreu i PD-së dhe as ndonjë komision i zgjedhur prej tij nuk mund të kenë rol në vendimmarrjen e LDG-së.
“Kryetari i PD-së Lulzim Basha më informoi sot se ai ka vendosur të fillojë nje proces të zgjedhjeve në Lidhjen Demokratike të Gruas së Shqipërisë. Ai më informoi, me anë të një telefonate, edhe se ka vendosur që zgjedhja e kryetares së forumit të bëhet me një anëtar një votë.
Dëshiroj të theksoj me ketë rast:
- Ndërhyrja e kryetarit të PD, duke krijuar procedura sipas dëshirës së tij dhe në shkelje të statutit të LDGSH, janë një dhunim arrogant i punës së strukurave dhe anëtareve të LDG.
- Informoj publikun se LDGSH është në përfundim të procesit të anëtarësimeve, organizimit dhe zgjedhjes bazuar në Statutin e LDGSH. Janë zgjedhur drejtueset lokale të forumit të gruas, në mbi 600 grupseksione me parimin një anëtar një votë dhe në 74 degë. Pjesë vijuese e këtij procesi është gara për zgjedhjen e drejtueseve të LDG.
- Zgjedhjet në LDG organizohen nga vetë forumi, sipas përcaktimeve statutore. As kryetari i PD-së, dhe asnjë komision zgjedhor i ngritur prej tij nuk mund të kenë rol në vendim-marrjen dhe menaxhimin e procesit. Drejtimi dhe vendim-marrja e forumit janë krejtësisht të shkëputura nga ato të Partisë. Asnjë drejtues i PD-së nuk ka rol në vendim-marrjen e LDG-së.” – shkruan Vokshi.
Deputetja demokrate thotë se vendimi i Bashës është arbitrar, uzurpues e qesharak. Ajo e akuzon kryedemokratin se kërkon të vërë nën kontroll forumin e gruas duke shpërfillur kontributin e tyre dhe statutin e organizatës.
Në fund Vokshi shkruan se LDG-ja do e vijojë procesin e zgjedhjeve në bazë të statutit të saj.
“Vendimi i zotit Basha është arbitrar, uzurpues dhe i bërë në mënyrë qesharake me telefonatë. Qëllimi i vendimit është të shbëjë të gjithë procesin e deritanishëm të zgjedhjeve brenda LDG-së dhe të vërë nën kontroll të tij edhe forumin e gruas së PD, duke shpërfillur jo vetëm statutin, por edhe kontributin e mbi 10 mijë grave që morën pjesë në zgjedhjet e brendshme në LDGSH. Veprimi i tij është braktisje e rëndë e anëtarësisë dhe e grave demokrate. Zoti Basha fatkeqësisht tani nuk i takon, nuk i pyet, nuk u merr mendim demokrateve e demokratëve për asgjë. Ky diktat është braktisje e anëtarësisë dhe e grave demokrate. Udhëheqja e Partisë duhet të flasë e bashkëpunojë me demokratët kudo ku ata janë, e jo vetëm me socialistët në Kuvend. LDGSH do të vijojë të mbështet në statutin e saj dhe parimet e themelimit të PD si forcë konservatore. LDGSH do të vijojë procesin e zgjedhjeve në bazë të statutit të saj.” – mbyll reagimin Vokshi.