SHBA do rihapë kufijtë e saj të hënën për vizitorët e huaj, duke i dhënë fund një ndalimi 20-mujor të hyrjes.
Ndalimi u vendos nga ish-presidenti Donald Trump për shkak të Covid-19.
Ai ka prekur qytetarët jo-amerikanë nga mbi 30 vende, duke përfshirë Britaninë e Madhe dhe shtetet e BE-së, duke ndarë familjet dhe duke bllokuar turizmin.
Linjat ajrore presin një vërshim vizitorësh pasi kufizimet janë hequr për ata që janë plotësisht të vaksinuar dhe i nënshtrohen testimit dhe gjurmimit të kontakteve.
“Ndihet mirë, ndjehet mirë!” Jerome Thomann, kreu i agjencisë së udhëtimeve me bazë në Paris, Jetset Voyages tha për agjencinë e lajmeve Reuters, duke thënë se ekipi i tij kishte parë një “rritje të jashtëzakonshme” në rezervime.
Në përpjekje për të ndaluar përhapjen e koronavirusit, kufijtë e SHBA fillimisht u mbyllën për udhëtarët nga Kina në fillim të vitit 2020. Kufizimet më pas u shtrinë në vende të tjera.
Rregullat ndaluan hyrjen për shumicën e qytetarëve jo-amerikanë që kishin qenë në Mbretërinë e Bashkuar dhe një numër vendesh të tjera evropiane, si dhe në Kinë, Indi, Afrikën e Jugut, Iran dhe Brazil.
Sipas rregullave të reja, udhëtarët e huaj do të duhet të tregojnë provën e vaksinimit përpara se të fluturojnë, të marrin një rezultat negativ të testit Covid-19 brenda tre ditëve nga udhëtimi dhe të dorëzojnë informacionin e tyre të kontaktit. Ata nuk do të karantinohen.
