Hungaria mund të përballet me gjoba nga Bashkimi Evropian për moszbatimin e një vendimi të gjykatës së lartë të bllokut për trajtimin e refugjatëve dhe trajtimin e kërkesave për azil.
Komisioni Evropian, krahu ekzekutiv i bllokut prej 27 anëtarësh, tha në një deklaratë të premten se do ta referonte Hungarinë në Gjykatën e Drejtësisë së BE-së për dështimin në ndryshimin e procedurave të saj të azilit në përputhje me vendimin e gjykatës dhe rekomandoi dënime financiare të qëndrueshme derisa Budapesti të përmbushë detyrimet.
Në deklaratën e tij, komisioni tha se “deri sot, Hungaria nuk ka trajtuar disa aspekte të gjykimit”.
“Në veçanti, Hungaria nuk ka marrë masat e nevojshme për të siguruar akses efektiv në procedurën e azilit,” tha ai. “Hungaria gjithashtu nuk ka sqaruar kushtet që kanë të bëjnë me të drejtën për të qëndruar në territor në rast apelimi në një procedurë azili”.
Referimi erdhi pasi gjykata e BE-së lëshoi një vendim në dhjetor që zbuloi se Hungaria kishte dështuar të respektonte ligjin e BE-së duke u mohuar të drejtën, njerëzve që të hynin në vend pa leje, për të aplikuar për azil dhe duke i ndaluar në mënyrë të paligjshme në “zonat e tranzitit” në kufirin e saj me Serbisë.
Kryeministri i Hungarisë Viktor Orban është një kundërshtar i palëkundur i emigracionit dhe e ka portretizuar vendin e tij si një mburojë kundër emigrantëve nga Lindja e Mesme dhe Afrika dhe një mbrojtës i krishterimit në Evropë.
Orban është gjithashtu një kritik i ashpër i BE-së dhe Hungaria përballet me ndëshkime financiare për atë që blloku e sheh si shkelje të vlerave të saj themelore dhe të shtetit të së drejtës.
Rreth 8 miliardë dollarë në fondet e BE-së për rikuperimin e koronavirusit, të destinuara për Hungarinë, janë mbajtur për shkak të masave të pamjaftueshme mbrojtëse kundër korrupsionit në planin e saj të shpenzimeve.
Të premten, Komisioni i kërkoi gjykatës së BE-së të vendosë gjoba kundër Hungarisë në formën e një shume të madhe dhe një gjobë ditore. Një gjobë e tillë do të ishte e ngjashme me sanksionet e BE-së të vendosura së fundmi ndaj Polonisë, një aleate kyçe e Hungarisë, e cila në tetor u urdhërua të paguante 1 milion euro në ditë për ato që BE e sheh si shkelje të vlerave të saj në lidhje me gjyqësorin.
