Lumi Yamuna i Indisë është bërë aq i ndotur sa shkuma e bardhë toksike tani mbulon sipërfaqen e ujit gjithandej. Pavarësisht rrezikut të dukshëm, shumë banorë të kryeqytetit vazhdojnë të lahen dhe të peshkojnë në lumë.
Sipas raporteve lokale, shkuma e bardhë u vu re për herë të parë të hënën pranë Kalindi Kunj në periferi të kryeqytetit Delhi. Në videot e shpërndara në internet, shkuma, e cila ngjan me ajsbergë të vegjël, mund të shihet në majë të ujërave të lumit Yamuna.
Nuk është hera e parë që një shkumë e tillë, që shkaktohet nga nivelet e larta të amoniakut dhe fosfateve, krijohet në lumë. Pasi shkuma u shfaq në korrik 2020, Komiteti i Monitorimit tashmë i shpërbërë i Yamuna u bëri thirrje autoriteteve të qytetit dhe federale që të hetojnë tërësisht çështjen.
Ekspozimi i drejtpërdrejtë mund të shkaktojë irritim të lëkurës dhe probleme të frymëmarrjes. Pavarësisht nga rreziqet e dukshme shëndetësore, besimtarët hindu kanë vazhduar me ritualet e tyre në brigjet e lumit. Rreth 70% e furnizimit me ujë për Delhin vjen nga lumi dhe siguron jetesën për shumë peshkatarë në rajon.
Çështja e shkumës vjen ndërsa ajri i qytetit po pastrohet nga fishekzjarret festive për të shënuar festivalin Diwali në fundjavë. Përqendrimi i grimcave helmuese PM2.5 u rrit shumë më lart se nivelet e ‘sigurta’.
Organizata Botërore e Shëndetësisë i konsideron të pasigurta nivelet vjetore të PM2.5 mbi pesë mikrogramë, megjithatë disa raportime gjatë festës Diwali në Delhi arritën në 706 mikrogramë, sipas informacionit të cituar nga Reuters.
