Ish-strategu i Donald Trump, Steve Bannon është akuzuar për mospërfillje të Kongresit pasi refuzoi të jepte dëshmi për trazirat e Kapitolit të SHBA-ve.
BBC shkruan se Bannon u thirr për të dëshmuar për atë çfarë dinte mbi planet për protestën që përfundoi me sulmin në Kongres.
Dhoma e Përfaqësuesve votoi muajin e kaluar për ta dërguar çështjen në Departamentin e Drejtësisë, i cili zgjodhi të premten të ndjekë penalisht zotin Bannon, i cili është 67 vjeç.
Ai mund të përballet me një vit burg dhe një gjobë prej 100 mijë dollarë.
Mbështetësit e ish-presidentit Donald Trump bastisën ndërtesën e Kongresit të SHBA-ve më 6 janar, ndërsa ligjvënësit po mblidheshin për të vërtetuar rezultatin e zgjedhjeve.
Trump ka refuzuar të pranojë humbjen e zgjedhjeve ndaj presidentit demokrat Joe Biden vitin e kaluar, duke pretenduar se zgjedhjet ishin manipuluar.
Për çfarë akuzohet saktësisht Bannon?
Kjo ishte aktakuza e parë e tillë që doli nga hetimi i Komitetit të Përzgjedhur të Dhomës së Përfaqësuesve për pushtimin e kompleksit të Kapitolit më 6 janar.
Një nga akuzat ndaj Bannon lidhet me refuzimin e tij për t’u paraqitur për një dëshmi dhe tjetri është për refuzimin e tij për të paraqitur dokumente për komitetin.
Këshilltari politik i cili u shkarkua nga Shtëpia e Bardhë në vitin 2017, pritet t’i dorëzohet autoriteteve të hënën, kur do të dalë në gjykatë.
Në një deklaratë të premten, Prokurori i Përgjithshëm i SHBA-ve Merrick Garland tha se aktakuza pasqyronte “angazhimin e palëkundur” të Departamentit të Drejtësisë për sundimin e ligjit.
Dokumentet citojnë Bannon-in i cili aktualisht drejton podkastin e Dhomës së Luftës së krahut të djathtë, të ketë thënë në prag të trazirave se “ferri do të shpërthejë nesër”. Avokatët e 67-vjeçarit argumentuan se komunikimet e tij që përfshinin ish-presidentin ishin të mbrojtura.
