Bjellorusia ka njoftuar se nevojiten ‘riparime të paplanifikuara’ në një degë të tubacionit që transporton naftë nga Rusia drejt një numri shtetesh të BE-së, duke këmbëngulur se puna e mirëmbajtjes do të zgjasë tre ditë.
Në një deklaratë të lëshuar të mërkurën, gjiganti rus i eksportit të energjisë Transneft tha se furnizimet mund të përballen me ndërprerje afatshkurtër. Zëdhënësi Igor Demin u tha gazetarëve se ishte informuar se puna e riparimit të improvizuar duhet të përfundonte deri në fundjavë. Tubacioni lidh fushat e naftës në Rusinë Qendrore me konsumatorët në Poloni, Hungari, Çeki dhe Gjermani.
Operatori bjellorus, Gomeltransneft Druzhba, thuhet se filloi punën të martën në mbrëmje, me furnizimet që do të zvogëloheshin. Megjithatë, zyrtarët thonë se vëllimet mujore të eksporteve nuk do preken dhe Demin këmbënguli që Transneft shpreson të sigurojë që kuotat e tij të shpërndarjes të përmbushen.
Lajmi vjen vetëm disa ditë pasi presidenti i vendit, Lukashenko, paralajmëroi se vendi i tij mund të ndërpresë rrjedhjen e gazit në Evropën Qendrore dhe Perëndimore, si përgjigje ndaj një mosmarrëveshjeje të përkeqësuar mbi emigracionin e paligjshëm në kufirin me Poloninë.
