Shkencëtarët në Suedi pohojnë se një proteinë e vetme në gjak mund të parashikojë fillimin e diabetit të tipit 2 gati 20 vjet përpara se kjo të ndodhë. Zbulimi prek qindra miliona njerëz në mbarë botën.
Diabeti është shkaku i nëntë i vdekjeve në botë dhe prek gati gjysmë miliardë njerëz në mbarë botën, sipas Organizatës Botërore të Shëndetësisë (OBSH).
Shumica dërrmuese e pacientëve me diabet vuajnë nga diabeti i tipit 2, një gjendje që mund të çojë në verbëri, dështim të veshkave, sulme në zemër, goditje në tru dhe amputim të gjymtyrëve të poshtme. Rastet e diabetit u katërfishuan në mbarë botën midis viteve 1980 dhe 2014, ndërsa për këtë rritje fajësohen dietat jo të shëndetshme dhe mungesa e ushtrimeve.
Megjithatë, studiuesit në Universitetin Lund në Malmo, Suedi pohojnë se nivelet e ngritura të një proteine të caktuar – follistatin – në gjak mund të parashikojnë fillimin e diabetit të tipit 2, pavarësisht nga mosha, pesha, dieta ose niveli i aktivitetit të një personi. Në një studim të publikuar javën e kaluar, shkencëtarët shkruan se nivelet e larta të follistatinës mund të parashikojnë gjendjen deri në 19 vjet përpara se të shfaqen simptomat.
Për të zbuluar lidhjen midis follistatinës dhe diabetit, studiuesit gjurmuan 5,300 njerëz nga Suedia, Italia dhe Britania e Madhe për katër deri në 19 vjet. Follistatina ndihmon në zbërthimin e yndyrës së trupit, ndërsa njëkohësisht çon në një rritje të yndyrës në mëlçi. Ky grumbullim mund të shkaktojë sëmundje të mëlçisë yndyrore dhe diabetin e tipit 2.
Ndërsa nivelet e follistatinës rriten në përgjigje të marrjes së ushqimit dhe niveleve të aktivitetit, këshillat për parandalimin e diabetit mbeten të njëjtat si vaktet e ekuilibruara, ngrënia e shëndetshme dhe ushtrimet e rregullta.
