Ish-luftëtarët e ISIS-it kanë pretenduar se Forcat Demokratike Siriane (SDF) të udhëhequra nga kurdët po paguajnë 8,000 dollarë për person për të liruar militantët nga burgjet sipas një të ashtuquajture skemë “pajtimi”.
Sipas një raporti në gazetën The Guardian, ish-luftëtarët e ISIS-it, të cilët luftuan për grupin militant derisa u mposht në vitin 2019, siguruan lirinë e tyre nga objekti i burgut sirian al-Hawl përmes kësaj skeme.
Aktualisht, tre burgje të kontrolluara nga SDF në Sirinë verilindore mendohet se mbajnë rreth 8,000 individë irakianë dhe sirianë që akuzohen se luftuan për ISIS-in, si dhe 2,000 të huaj që presin të deportohen në vendet e tyre të origjinës.
Ish-militantët e ISIS-it pretenduan se të paktën 10 persona, në dijeninë e tyre, kanë blerë lirinë e tyre përmes asaj që thuhet se është quajtur një skemë “pajtimi”. Të dy burrat i dhanë gazetës me bazë në Britani dokumentacion për të mbështetur pretendimet e tyre, si dhe dëshmi se si ata ishin liruar nga paraburgimi.
Një individ, Abu Jafar, i cili pretendon se u lirua pasi familja e tij shiti disa prona, deklaroi se pagoi 8,000 dollarë si gjobë, si dhe 22,000 dollarë të tjera ryshfet për zyrtarët e SDF. Në mënyrë të ngjashme, Abu Muhamedi, i cili thotë se luftoi përkrah ISIS-it në vijën e frontit, tha se kishte paguar shifrën prej 8,000 dollarë dhe 14,000 dollarë ryshfet.
Zëdhënësi i SDF, Farhad Shami, ka mohuar ekzistencën e skemës, duke hedhur poshtë dokumentacionin e parë nga Guardian dhe duke deklaruar se asnjë pagesë nuk është marrë për lirimin e ish-luftëtarëve të ISIS. Megjithatë, Shami pranoi që disa individë, të cilët punonin në “zyrat e drejtuara nga IS ose ishin të detyruar të bashkoheshin me IS” u liruan nëse “duart e tyre nuk ishin të njollosura me gjak”. Megjithatë, ai tha se kushdo i liruar është “monitoruar nga forcat e sigurisë” për t’u siguruar që ata të mos kërkojnë të bashkohen ose të ndihmojnë përsëri grupin militant.
Koalicioni ndërkombëtar anti-IS refuzoi të komentojë mbi skemën e raportuar, duke deklaruar se objektet e burgut kontrollohen nga SDF.
