Tajvani po shqyrton mundësinë e bashkëpunimit me shtetet e Evropës Lindore për gjysmëpërçuesit në mes të mungesës globale të furnizimit me çipa. Kështu zbuloi këtë të enjte një ministër tajvanez.
“I gjithë zinxhiri i furnizimit të gjysmëpërçuesve është i madh. Shumë vende mund të luajnë role të ndryshme.”- u tha gazetarëve kreu i Këshillit Kombëtar të Zhvillimit të Tajvanit, Kung Ming-hsin, një muaj pas vizitës në Sllovaki, Republikën Çeke dhe Lituani.
Ai tha se të tre vendet shprehën gatishmërinë për të punuar së bashku në çipat gjysmëpërçues me Tajvanin, i cili mban një pjesë prej 63% të tregut global të gjysmëpërçuesve.
Komisioni Evropian në shtator propozoi një pjesë të re legjislacioni për të rritur prodhimin e çipave në mes të mungesës globale që solli vonesa në shumë industri, me prodhuesit e makinave të goditura më rëndë. I ashtuquajturi “Akti i Çipave” synon të nxisë kërkimin e çipave, kapacitetin e prodhimit vendas të gjysmëpërçuesve dhe bashkëpunimin ndërkombëtar në prodhimin e çipave.
Kung tha se ishte një detyrë e vështirë për Evropën që ta bënte vetë.
“Kështu që ata shpresojnë të bashkëpunojnë me Tajvanin.”- shpjegoi ai, citon RT.
Zyrtari vuri në dukje se Tajvani aktualisht planifikon të krijojë grupe pune me të tre vendet për të kuptuar se si saktësisht mund të bashkëpunojnë për çipat. Gjithashtu do t’u japë partnerëve evropianë bursa për trajnim teknik në industrinë e gjysmëpërçuesve.
Tajvani mban pothuajse monopolin në prodhimin global të gjysmëpërçuesve, me kompaninë Taiëan Semiconductor Manufacturing Company (TSMC) që zë 54% të pjesës globale të tregut të çipave. Kompanitë e mëdha amerikane të teknologjisë, duke përfshirë Apple dhe Nvidia, i marrin deri në 90% të gjysmëpërçuesve të tyre nga prodhuesit Tajvanezë.
