Ministri i Arsimit i Polonisë ka mbajtur anën e prindërve që kërkojnë të luftojnë kundër edukimit seksual brenda shkollave.
Që tani e tutje, do të jetë më e lehtë për prindërit të kërkojnë që programet e edukimit seksual të mos mësohen në shkollë, njoftoi në fundjavë ministri i Arsimit Przemyslaw Czarnek, duke cituar një vendim të miratuar në mbledhjen e fundit të kabinetit.
“Me kërkesën e prindërve, mbikëqyrësi i arsimit do të jetë në gjendje të bllokojë futjen e përmbajtjes në shkolla që është moralisht korruptuese për fëmijët,” tha Czarnek.
Ministri veçoi një nga programet, të quajtur ‘Dashuri e shëndetshme’, që u prezantua nga autoritetet në qytetin verior të Gdansk në 2017, por u pezullua në mars 2020 për shkak të pandemisë së koronavirusit.
‘Dashuri e shëndetshme’ ofroi edukim seksual për nxënësit e shkollave të mesme si pjesë e një ‘programi mbështetës të riprodhimit’. Pjesëmarrja kërkonte pëlqimin e prindërve, të cilët ishin në gjendje të zgjidhnin klasat specifike që mund të ndiqnin fëmijët e tyre.
“Nëse kryebashkiakja dëshiron të ofrojë këtë lloj edukimi për fëmijët në Gdansk, ajo mund ta bëjë atë në ambiente që i përkasin qytetit, por jo në shkollë,” tha Czarnek.
Ministri konservator ka kritikuar vazhdimisht edukimin seksual në shkollë. Në fillim të këtij viti, ai hodhi idenë për t’u mësuar fëmijëve mbi seksualitetin si dhe biznesin duke përdorur shkrime të shkruara nga Papa Gjon Pali II.
Përgatiti për Hashtag.al, Klodian Manjani
