Papa Françesku ka vizituar sot Athinën, ku ka folur për një kthim në “politikën e mirë”. Ai u shpreh se demokracia është përkeqësuar në mënyrë të rrezikshme pasi njerëzit e pakënaqur joshen nga “këngët e sirenave” të politikanëve populistë që premtojnë zgjidhje të lehta por joreale.
Siç shkruan Reuters, Papa mbërriti nga Qiproja në Athinë, që shpesh shihet si vendlindja e demokracisë, por qëllimi kryesor i këtij udhëtimi është të tërheqë vëmendjen mbi gjendjen e vështirë të emigrantëve dhe refugjatëve.
Në një fjalim në pallatin presidencial, Françesku citoi filozofë dhe shkrimtarë të lashtë grekë si Aristoteli dhe Homeri. Ai kërkoi një kthim në politikën që favorizon të mirën e përbashkët dhe nuk është e zhytur në rrënjosjen e frikës.
“Ne nuk mund të shmangim vërejtjen me shqetësim se si sot dhe jo vetëm në Evropë, ne jemi dëshmitarë të një tërheqjeje nga demokracia.”– tha Françesku.
Ai e quajti demokracinë një përpjekje komplekse, por thelbësore që kërkon pjesëmarrje të gjerë, “ndërsa autoritarizmi është i detyrueshëm dhe përgjigjet e lehta të populizmit duken tërheqëse”.
Papa Françesku nuk përmendi asnjë vend në fjalimin e tij, por në të kaluarën ai ka kritikuar politikat e një numri politikanësh, duke përfshirë ish-presidentin e SHBA-ve Donald Trump dhe liderin italian të ekstremit të djathtë Matteo Salvini, veçanërisht për çështjen e emigracionit.
Papa Françesku tha se njerëzit duhet të kenë kujdes nga politikanët me “një kërkim obsesiv për popullaritet me një etje për t’u dukur, në një stuhi premtimesh joreale…”
Papa shtoi se ai shpresonte se demokracia e forcuar kudo “mund të jetë përgjigja ndaj këngëve të sirenave të autoritarizmit; dhe se individualizmi dhe indiferenca mund të kapërcehen nga shqetësimi për të tjerët, për të varfërit dhe për krijimin”.
Greqia është një nga pikat kryesore të hyrjes në Bashkimin Evropian për azilkërkuesit që ikin nga lufta dhe nga varfëria në Lindjen e Mesme, Azi dhe Afrikë.
