Dy persona janë vrarë dhe katër të tjerë kanë mbetur të plagosur kur një person i armatosur hapi zjarr brenda një zyre të shërbimeve publike në Moskë.
Ngjarja e rëndë ka ndodhur këtë të martë dhe u konfirmua nga kryetari i bashkisë së kryeqytetit rus, Sergei Sobyanin.
“Si pasojë e të shtënave nga një person i panjohur, dy persona mbetën të vrarë.”- shkroi ai në “Twitter”, citon The Moscow Times.
Ministria e Brendshme ruse tha se sulmuesi ishte një 45-vjeçar b,anor i Moskës dhe se ai ishte dërguar në një stacion policie.
Nënkryetarja e bashkisë Anastasia Rakova tha se viktimat ishin dy punonjës të qendrës së shërbimeve publike “një administrator dhe një roje sigurie”.
Ajo tha se katër persona të tjerë u plagosën, duke përfshirë një vajzë 10-vjeçare.
Fëmija ishte në gjendje “të rëndë” dhe ishte dërguar në spitalin e fëmijëve. Tre të rriturit e plagosur janë duke u operuar.
Incidenti ndodhi në një zyrë qeveritare shumëfunksionale që merret me një sërë çështjesh administrative në juglindje të Moskës. Rakova tha se stafi dhe vizitorët e Qendrës së Zyrave Publike Ryazansky u evakuuan “menjëherë” kur të shtënat filluan rreth orës 15:00 me orën e Moskës.
Në një deklaratë, Ministria e Brendshme ruse tha se burri hyri në qendër “dhe filloi të qëllonte mbi qytetarët atje, pas të cilëve ai u përpoq të fshihej”. Një oficer i zbatimit të ligjit që ishte në vendngjarje “arriti të kapte dhe neutralizonte sulmuesin”.
Disa agjenci raportuan gjithashtu se sulmuesi ishte një ish-ushtarak. Identiteti i sulmuesit dhe motivet e tij nuk janë bërë ende të ditura.
