Moti i keq ka përfshirë vendin prej ditësh. Autoriteti Rrugor Shqiptar i bën apel shoferëve që të tregohen të kujdesshëm gjatë udhëtimit në zonat me borë.
ARRSH bën thirrje që drejtuesi e automjeteve të pajisen me goma dimërore dhe zinxhirë për të mos sjellë pengesë në qarkullim dhe bllokim të akseve rrugore.
“Apel për drejtuesit e mjeteve që udhëtojnë për në vendet me prezencë bore duhet të pajisen me goma dimërore dhe zinxhirë për të mos sjellë pengesë për qarkullimin e mjeteve, punën e mjeteve borëpastruese dhe bllokimin e akseve rrugore.
Bëni kujdes në lëvizje dhe respektoni sinjalistikën rrugore reduktoni shpejtësinë, pajisuni me zinxhirë dhe goma dimërore ndiqni udhëzimet e Policisë Rrugore.”– thuhet në njoftimin e ARRSH-së.
Po ashtu Ministria e Mbrojtjes ka publikuar një komunikim zyrtar rreth situatës gjatë dy ditëve të fundit.
Sipas Ministrisë reshjet me intensitet kanë sjellë problematike në disa zona, por falë ndërhyrjes nga Emergjencat Civile situata është në kontroll në të gjithë territorin, ndërsa po ndiqet me prioritet gjendja në qarqe të caktuara për shkak të prurjeve të shumta të lumenjve.
“Në të gjithë vendin, hidrovoret punojnë me kapacitet të plotë, duke ruajtur nivelin mesatar të kuotave, rezervuarët po monitorohen dhe janë nën kontroll. Sa i përket infrastrukturës rrugore, vijon qarkullimi normal në të gjitha akset nacionale dhe rurale. Me përjashtim të disa rasteve edhe furnizimi me energji në të gjithë vendin vijon normalisht, po ashtu edhe furnizimi me ujë nuk ka ndërprerje. Kështu prurjet më të shumta janë ato të lumit Vjosa, por niveli i ujit është brenda kufirit maksimal pa rrezikshmëri. Edhe lumenjtë e tjerë janë në nivele mesatare dhe nuk paraqesin rrezik për dalje nga shtrati.
Në Këlcyrë forcat zjarrfikëse dhe të bashkisë po punojnë për pastrimin e ujit në një banesë për shkak të bllokimit të tubacioneve. Emergjencat Civile ndodhen në terren dhe në gatishmëri në qarkun e Gjirokastrës, pikërisht në segmentet rrugore Kolonjë-Golem, në njësinë Cepo, në njësinë Qytet apo në Lazarat, ku vijon puna për të mbajtur të zhbllokuar akset si shkak i prurjeve të shumta. Edhe në Dropull janë vënë në gatishmëri mjetet për pastrimin e ujit si shkak i daljes së përroit Sopot. Në njësinë administrative Pogon, Zagori, Dropull i Poshtëm e Dropull i Sipërm, fshatin Nderan të bashkisë Libohovë po punohet nga ana e punonjësve të OSHEEE për furnizimin me energji elektrike. Po punohet për riparimin e defekteve edhe në Shkodër, ku pati stakim të Fiderit të Hajmelit dhe Lavatrices në nënstacionin Vau i Dejës. Reshjet e shumta kanë sjellë probleme në bashkinë Selenicë, ku po ndiqet më vëmendje situata në fshatin Mesaplik, ku prurjet e lumit Shushica dëmtuan urën. Ka vështirësi në qarkullim në rrugën Peshkopi-Selishtë, ndërsa forcat e policisë rrugore kanë orientuar lëvizjet në aksin Lurë-Rrëshen, pas bllokimit të rrugës rurale Peshkopi- Lurë.”– njofton Ministria e Mbrojtjes.
