Kina, e mbështetur nga Rusia, bllokoi një projektrezolutë të SHBA-së të hënën në Këshillin e Sigurimit të OKB-së që do të ofronte një sistem për përjashtime humanitare nga sanksionet ekonomike të vendosura ndaj Afganistanit të kontrolluar nga Talibanët.
“Ata duan fshirjen” e një paragrafi të rezolutës që lejon komitetin e sanksioneve përgjegjës për Afganistanin të sigurojë “përjashtime nga ngrirja e aseteve” nëse konsideron se “një heqje e tillë është e nevojshme për të lehtësuar ndihmën e mëtejshme për Afganistanin,” tha një diplomat për AFP në kushte anonimiteti.
Kina, e cila është “në parim kundër sanksioneve”, është “kundër një mekanizmi përjashtimi rast pas rasti”, konfirmoi një tjetër diplomat.
“Ndihma humanitare dhe ndihma për shpëtimin e jetës duhet të jenë në gjendje të arrijnë tek populli afgan pa asnjë pengesë”, tha ambasadori i Kinës në OKB Zhang Jun në një postim në Twitter të hënën. “Kushtet apo kufizimet e krijuara artificialisht nuk janë të pranueshme”.
Uashingtoni shpresonte për miratimin të hënën të draftit të tyre nga 14 anëtarët e tjerë të Këshillit të Sigurimit, në mënyrë që ata të mund ta vendosnin atë në votim të martën, thanë burimet diplomatike.
“Aktualisht nuk ka përjashtime humanitare nga regjimi i sanksioneve” të vendosura ndaj talebanëve në vitin 2015 dhe për punonjësit e ndihmës që “të kryejnë transaksione financiare me ministritë e drejtuara nga njerëz nën sanksione do të shkelte sanksionet,” tha një diplomat.
Pasi braktisën paragrafin e diskutueshëm për përjashtimet rast pas rasti, Shtetet e Bashkuara paraqitën një draft të ri të hënën vonë, ku thuhej se, për periudhën njëvjeçare, ndihma humanitare nuk do të konsiderohej se shkel sanksionet ndaj Afganistanit.
Martin Griffiths, kreu i OKB-së për çështjet humanitare, tha se “nevoja për likuiditet dhe stabilizim të sistemit bankar tani është urgjente — jo vetëm për të shpëtuar jetët e popullit afgan, por edhe për të mundësuar reagimin e organizatave humanitare”.
