Departamenti amerikan i Thesarit njoftoi të mërkurën se kishte futur në listën e zezë tre individë të lidhur me Al-Kaedën dhe dy entitete me bazë në Brazil.
“Aktivitetet e këtij rrjeti me bazë në Brazil tregojnë se Al-Kaeda mbetet një kërcënim i përhapur terrorist global,” tha nënsekretari i Thesarit Brian Nelson, duke shtuar se sanksionet e reja synonin të frenonin mbështetjen financiare të grupit terrorist.
Thesari emëroi Haytham Ahmad Shukri Ahmad Al-Maghrabi si një nga anëtarët fillestarë të rrjetit brazilian të Al-Kaedës. Ai mbërriti në vend në vitin 2015 dhe kishte marrëdhënie të shumta biznesi, duke përfshirë “blerjen e valutës së huaj”.
Një person tjetër në listën e sanksioneve është Mohamed Sherif Mohamed Mohamed Awadd, për të cilin Thesari tha se ishte i përfshirë në shtypjen e monedhës së falsifikuar. Awadd dhe një individ tjetër në listën e zezë, Ahmad Al-Khatib, thuhet se kishin në pronësi biznese mobiljesh në Sao Paulo, qyteti më i madh i Brazilit. Të gjithë personat e sanksionuar thuhet se i kanë ofruar mbështetje Al-Kaedës.
Al-Kaeda ishte përgjegjëse për sulme të shumta ndaj civilëve dhe trupave amerikane, duke përfshirë sulmin terrorist të 11 shtatorit, në të cilin vdiqën rreth 3,000 njerëz. Themeluesi i grupit, Osama bin Laden, u vra nga komandot amerikane në vitin 2011 në Pakistan.
