Numri i të vdekurve nga zjarri që ra të premten në një traget në kryeqytetin e Bangladeshit, Daka, është rritur në 38, thanë burimet spitalore të shtunën, ndërsa operacionet e kërkim-shpëtimit vazhdojnë për të dytën ditë radhazi.
Të paktën 40 udhëtarë të plagosur rëndë janë ende duke u trajtuar në tre spitale në Daka dhe divizionin jugor të Barisal. Prej tyre, gjendja e më shumë se një duzinë personave mësohet të jetë kritike.
Dr. Samanta Lal Sen në Institutin Kombëtar të Djegieve dhe Kirurgjisë Plastike në kryeqytet, tha: “Tani po trajtojmë gjithsej 15 pacientë nga zjarri në traget. Njëri prej tyre vdiq sot dhe gjendja e të tjerëve është gjithashtu kritike.”
Në orët e para të së premtes, trageti i pasagjerëve, MV Ovijan, mori flakë në lumin Sugandaha teksa po shkonte në rajonin jugor të Barguna nga kryeqyteti Daka.
Ndërkohë, disa media lokale raportuan se numri i të vdekurve nga incidenti ka shkuar në 41.
Sipas dëshmive paraprake dhe deklaratave të dëshmitarëve okularë, zjarri ka ardhur nga motori pas shpërthimit të një bombole gazi.
