Afrika e Jugut ka kërkuar ndalimin e një ankandi të çelësit të qelisë së burgut në ishullin Robben, të pushtuar dikur nga ish-presidenti Nelson Mandela.
Shitja e çelësave pritet të bëhet në janar në New York (SHBA) nga shtëpia e ankandit Guernsey. Shitësi është Christo Brand, ish-gardiani i burgut famëkeq të Mandelës.
Por Nathi Mthethwa, ministri i kulturës i Afrikës së Jugut, tha se nuk kishte pasur konsultime me qeverinë e tij lidhur me këtë çështje.
“Ky çelës i përket popullit të Afrikës së Jugut.”- tha ai, citon BBC. “Nuk është pronë personale e askujt.”- shtoi ministri.
Shtëpia e ankandit Guernsey thotë se ankandi i planifikuar të bëhej më 28 janar është për të mbledhur fonde për një kopsht dhe muze përkujtimor përreth vendit të varrimit të Mandelës.
Çelësi i qelisë së burgut është një nga disa artikuj të nxjerrë në shitje. Pikat e tjera kryesore përfshijnë pikturën origjinale të Mandelës “The Lighthouse”, “Robben Island”, si dhe biçikletën e stërvitjes që atij iu lejua të përdorte dhe raketën e tenisit në burg.
Mandela, i cili është një hero kombëtar në Afrikën e Jugut, kaloi 18 nga 27 vitet e kohës së tij në burg në ishullin Robben. Gardiani i burgut Brand më vonë do të bëhej mik i ngushtë i Mandelës.
Mandela u lirua në vitin 1990 kur Afrika e Jugut filloi të largohej nga ndarja e rreptë racore (aparteidi) – një proces i përfunduar nga zgjedhjet e para shumë racore në vitin 1994, kur ai u zgjodh si presidenti i parë me ngjyrë i vendit.
Mandela shërbeu një mandat të vetëm, duke u larguar në vitin 1999. Ai vdiq në vitin 2013 në moshën 95-vjeçare.
