Mbi 10 mijë ushtarë rusë po kthehen tani në bazat e tyre në shtëpi, pas stërvitjeve njëmujore të mbajtura në rajone të ndryshme, përfshirë ato në kufi me Ukrainën.
Tërheqja u njoftua nga Komanda e Qarkut Ushtarak Jugor të shtunën, me Interfax që raportoi se forcat kanë përfunduar stërvitjen e tyre të “koordinimit operacional”. Siç shkruan RT, në njoftim u tha se më shumë se 10 mijë ushtarakë tani do të “marshojnë drejt bazave të tyre nga territori i poligoneve të përbashkëta të stërvitjes”.
Komanda konfirmoi se stërvitjet, të cilat zgjatën për rreth një muaj, u mbajtën në rajone të ndryshme, duke përfshirë Krimenë dhe Rajonin e Rostovit, në kufi me Ukrainën. Lajmi vjen në mes të tensioneve midis Moskës dhe NATO-s, mbi pretendimet për një rritje të trupave ruse pranë Ukrainës.
Mediat perëndimore dhe disa zyrtarë kanë vënë në dukje vazhdimisht numrin në rritje të ushtarëve dhe pajisjeve ruse të vendosura në rajonet në kufi me Ukrainën. Të enjten Bloomberg përforcoi akuzat, duke cituar të dhënat e ofruara nga firma perëndimore e inteligjencës së mbrojtjes Janes.
Lajmet që qarkulluan në media e shtynë Uashingtonin dhe aleatët e tij të paralajmërojnë Moskën për pasoja të rënda në rast se sulmon Ukrainën. Rusia në mënyrë të përsëritur e ka mohuar se ekzistonin plane të tilla dhe, nga ana tjetër, kërkon garanci sigurie nga NATO dhe SHBA në formën e një sërë propozimesh dërguar Brukselit dhe Uashingtonit.
Në fillim të dhjetorit, kreu i Shtabit të Përgjithshëm rus, gjenerali i ushtrisë Valery Gerasimov, tha se Moska nuk planifikon asnjë veprim sulmues, duke shtuar se NATO i kushton “vëmendje të tepruar” “praktikave rutinë ushtarake” që ndodhin brenda territorit sovran të Rusisë.
Lista e garancive përfshinte një kërkesë që NATO të mos zgjerohej drejt lindjes në shtetet që më parë ishin pjesë e BRSS-së. Një kërkesë e tillë u refuzua tashmë nga Sekretari i Përgjithshëm i NATO-s, Jens Stoltenberg në një intervistë me agjencinë gjermane të lajmeve dpa, por NATO dhe Uashingtoni shprehën gatishmërinë e tyre për të negociuar me Rusinë për sigurinë.
