Presidenti i vendit Ilir Meta ka komentuar sot përmes një postimi në rrjetet sociale, atentatin e një dite më parë të ndodhur në “Don Bosko”.
Meta shkruan se një akt i tillë kriminal në një nga zonat më të populluara të kryeqytetit, jo vetëm përbën një sfidë të hapur ndaj shtetit, por edhe një kërcënim të rëndë për sigurinë dhe jetën e qytetarëve.
“Dënoj me forcë ngjarjet kriminale të ditëve të fundvitit dhe të ditëve të para të vitit të ri, të ndodhura në disa qytete të vendit, e veçanërisht ngjarjen fatale në rrugën ‘Don Bosko’, në Tiranë, ditën e djeshme, që përfundoi me vrasjen e një shtetasi dhe plagosjen e disa të tjerëve.
Një akt i tillë kriminal, në një nga zonat më të populluara të kryeqytetit, jo vetëm përbën një sfidë të hapur të grupeve të krimit të organizuar ndaj shtetit dhe institucioneve të tij, por edhe një kërcënim të rëndë për sigurinë dhe për vetë jetën e qytetarëve të Tiranës.
Kjo është rrjedhojë e një sërë aktesh të tjera kriminale, që kanë mbetur të pazbuluara dhe ku autorët nuk janë vënë përpara drejtësisë.
I bëj thirrje Policisë së Shtetit, si dhe të gjithë institucioneve ligjzbatuese në vend, të forcojnë punën, së pari për arrestimin e autorëve të këtij krimi të rëndë, por edhe për të forcuar bashkëpunimin ndërmjet tyre për të parandaluar ngjarje të tilla në të ardhmen.”– shkruan Meta.
Një ditë më parë në një zonë të populluar të kryeqytetit në “Don Bosko” ndodhi një atentat ku mbetën 4 persona të plagosur dhe humbi jetën një person.
