Rregullatori i privatësisë në internet i Francës ka urdhëruar Google dhe Facebook që të paguajnë rreth 210 milionë euro, duke i gjobitur firmat për përdorimin e dyshimtë të ‘cookies’ të gjurmimit të të dhënave në faqet e tyre.
Komisioni Kombëtar Francez për Informatikë dhe Liri (CNIL) njoftoi masën në një deklaratë të enjten, duke thënë se Google do të detyrohet të paguajë 150 milionë euro dhe Facebook 60 milionë euro të tjera brenda një periudhe tre mujore ose përndryshe do të përballen me gjoba shtesë prej 100,000 eurosh në ditë.
Komisioni tha se mënyra se si kompanitë përdorin ‘cookies’ – sasi të vogla të dhënash të krijuara ndërsa përdoruesit shfletojnë faqet e internetit që mund të përdoren për të gjurmuar aktivitetin e tyre – ‘ndikon në lirinë e pëlqimit’,
“Kur pranoni cookie-t, kjo bëhet vetëm me një klikim”, tha Karin Kiefer, e cila drejton ekipin e komisionit për mbrojtjen e të dhënave dhe sanksionet.
“Refuzimi i cookies duhet të jetë po aq i lehtë sa pranimi i tyre.” – shtoi ajo.
Mbikëqyrësi shtoi se ato praktika shkelnin Aktin Francez për Mbrojtjen e të Dhënave dhe urdhëroi kompanitë t’u ofrojnë përdoruesve të internetit të vendosura në Francë një mjet për të refuzuar cookie-t në mënyrë të thjeshtë ashtu siç është mënyra për t’i pranuar.
Si Google ashtu edhe Facebook lëshuan deklarata duke u zotuar se do të punonin me autoritetet franceze për të zgjidhur çështjen, megjithëse Facebook këmbënguli se ‘kontrollet e pëlqimit të cookie-ve u ofrojnë njerëzve kontroll më të madh mbi të dhënat e tyre’, duke kundërshtuar çështjet e pëlqimit të ngritura nga CNIL.
Google, gjithashtu, argumentoi se ‘njerëzit na besojnë që të respektojmë të drejtën e tyre për privatësi dhe t’i mbajmë të sigurt’, por megjithatë tha se do të ndiqte ‘ndryshime të mëtejshme’ për të respektuar urdhrin.
