NATO është e hapur për të dëgjuar shqetësimet e Moskës, tha të premten kreu i bllokut Jens Stoltenberg. Megjithatë, ai shtoi se çdo lëvizje për të ulur tensionet mbi Ukrainën duhet të jetë reciproke dhe të mos dëmtojë ‘rendin e sigurisë’ evropiane.
Sekretari i Përgjithshëm shpjegoi qasjen e organizatës së tij ndaj negociatave me Moskën gjatë një konference për shtyp, pas një takimi të jashtëzakonshëm të ministrave të Jashtëm të vendeve anëtare.
Stoltenberg fajësoi drejtpërdrejt palën ruse për përkeqësimin e marrëdhënieve dhe tensioneve rreth Ukrainës, duke përsëritur pretendimet për një ‘ndërtim ushtarak’ të kryer nga Moska në kufijtë e fqinjëve të saj. Akuzat janë hedhur poshtë vazhdimisht nga Kremlini, i cili këmbëngul se çdo lëvizje e trupave brenda territorit të tij është rreptësisht punë e tij e brendshme.
“Rreziku i konfliktit është real. Veprimet agresive të Rusisë minojnë seriozisht rendin e sigurisë në Evropë”, këmbënguli Stoltenberg të premten.
Në të njëjtën kohë, zyrtari sinjalizoi se NATO nuk ishte ‘e etur’ për të hyrë në një luftë me Rusinë për Ukrainën. Ndërsa Perëndimi e ka paralajmëruar vazhdimisht Rusinë për ‘pasoja’ të rënda nëse ajo ‘pushton’ fqinjin e saj, Ukraina nuk është anëtare e NATO-s dhe një sulm ndaj saj nuk kërkon mbrojtjen kolektive të bllokut, u kujtoi Stoltenberg gazetarëve në konferencën për shtyp.
Duhet të kujtojmë se Ukraina është një partner shumë i ngushtë. Ne ofrojmë mbështetje për Ukrainën, por Ukraina nuk mbulohet nga klauzola e mbrojtjes kolektive të NATO-s, sepse Ukraina nuk është anëtare e NATO-s. Është partnere.”
