Ligjvënësi më i fuqishëm i Polonisë ka pranuar se vendi i tij ka blerë programin e spiunimit nga grupi i diskutueshëm izraelit NSO. Ai mohoi se ishte përdorur për të përgjuar politikanët, megjithatë, pranoi se ishte përdorur nga shërbimet sekrete.
Duke folur për revistën e përjavshme të krahut të djathtë Sieci, Jaroslaë Kaczynski, kreu i partisë në pushtet të Polonisë Ligj dhe Drejtësi (PiS), tha se ishte një gjë pozitive që shërbimet polake të sigurisë po përdornin këtë program të fuqishëm përgjues.
“Do të ishte keq nëse shërbimet polake nuk do të kishin këtë lloj mjeti.” – tha Kaczynski, duke iu referuar softuerit izraelit NSO. Kaczynski tha se softueri Pegasus përfaqësonte një përparim të madh teknologjik mbi sistemet ekzistuese të mbikqyrjes, duke vënë në dukje se shërbimet e sigurisë më parë nuk kishin qenë në gjendje të lexonin mesazhe të koduara.
Ndërsa pranoi se Polonia e kishte blerë softuerin nga NSO Group, ai pretendoi se ai nuk ishte përdorur për të synuar politikanët, raportoi Associated Press.
Softueri NSO i jep përdoruesit mundësinë për të hyrë në telefonin inteligjent të objektivave të tyre, për të lexuar mesazhe, për të parë fotot, për të gjurmuar vendndodhjet dhe madje për të ndezur kamerën, të gjitha pa dijeninë e përdoruesit të pajisjes.
