Rregullatorët e Bashkimit Evropian paralajmëruan se injeksionet e shpeshta përforcuese të COVID-19 mund të ndikojnë negativisht në reagimin imunitar të njeriut.
Përsëritja e dozave përforcuese çdo katër muaj mund të dobësojë përfundimisht përgjigjen imune dhe të lodhë njerëzit, sipas Agjencisë Evropiane të Barnave.
Në vend të kësaj, vendet duhet të lënë më shumë kohë midis dozave përforcuese dhe t’i lidhin ato me fillimin e sezonit të ftohtë në secilën hemisferë, duke ndjekur planin e përcaktuar nga strategjitë e vaksinimit të gripit, tha agjencia.
Këshilla vjen pasi disa vende konsiderojnë mundësinë për t’u ofruar njerëzve dozat e katërta në një përpjekje për të ofruar mbrojtje të mëtejshme kundër infeksioneve në rritje të Omicron.
Në fillim të këtij muaji, Izraeli u bë kombi i parë që filloi të administrojë një dozë të dytë përforcuese, ose injeksion të katërt, për ata mbi 60 vjeç.
Mbretëria e Bashkuar ka thënë se përforcuesit po ofrojnë nivele të mira mbrojtjeje dhe nuk ka nevojë për një injeksion të dytë përforcues për momentin por do të shqyrtojë të dhënat ndërsa ato ndryshojnë.
Përforcuesit ‘mund të bëhen një herë, ose ndoshta dy herë, por nuk është diçka që ne mund të mendojmë se duhet të përsëritet vazhdimisht’ tha Marco Cavaleri, kreu i Strategjisë së Kërcënimeve Biologjike të Shëndetit dhe Vaksinave të EMA, në një konferencë shtypi.
“Ne duhet të mendojmë se si mund të kalojmë nga mjedisi i tanishëm i pandemisë në një mjedis më endemik.”
Rregullatori i BE-së tha gjithashtu në konferencë se antiviralët oralë dhe intravenozë, si Paxlovid dhe Remdesivir, ruajnë efikasitetin e tyre kundër Omicron.
