Ukraina nuk konsiderohet një komb i madh kulturor nga vendet e tjera në Evropë, dhe për këtë arsye interesat e saj vazhdojnë të injorohen, është ankuar ambasadori i Kievit në Berlin.
Në një intervistë të martën me agjencinë shtetërore të lajmeve të Ukrainës ‘Ukrinform’, Andrey Melnik pohoi se problemi më i madh i kombit të tij është se ai ka pak status kulturor në skenën botërore.
“Mendoj se mangësia jonë kryesore gjatë 30 viteve të fundit është se ne ende nuk kemi arritur të afirmojmë veten si një komb i madh kulturor evropian, një subjekt historik me ndikim.” – shpjegoi ambasadori.
“Dhe kjo është ajo nga e cila varet njohja jonë politike, në një shkallë të madhe.”
Ai vazhdoi të ilustrojë se çfarë donte të thoshte, duke thënë se ‘kryeveprat e kompozitorëve ukrainas’ nuk shfaqen rregullisht në sallat gjermane të operës dhe nxënësve të shkollës atje nuk u mësohet letërsia ukrainase. Të gjitha ‘kërkesat e arsyeshme politike’ të Kievit do të vazhdojnë të injorohen ndërsa ky është rasti, pohoi Melnik.
Diplomati theksoi se ai dhe përfaqësues të tjerë nga Kievi vazhdojnë të punojnë për të tërhequr vëmendjen e liderëve evropianë, duke pohuar se elitat, gazetarët dhe ekspertët gjermanë duhet ‘të dinë se Ukraina ekziston, me qëllimet e veta, duke e krijuar me vendosmëri rrugën e saj’.
Melnik ka qenë i njohur në të kaluarën për retorikën e zjarrtë, duke përfshirë kërkesat që Berlini t’i kthejë Ukrainës Krimenë, të kontrolluar nga Rusia, dhe duke thënë se Gjermania ka një ‘përgjegjësi historike’ për të futur Ukrainën në NATO, bllokun ushtarak të udhëhequr nga SHBA.
Në intervistë, ai pranoi se veprimet e tij nuk i kanë dhënë gjithmonë miq në Berlin dhe tha se liderët gjermanë e kanë kundërshtuar disa herë për deklaratat e tij të diskutueshme. Megjithatë, ai pohoi se Ukraina duhet ta trajtojë aktivitetin e saj në Berlin si ‘diplomaci lufte’.
Në nëntor, Melnik publikoi një letër të hapur duke kërkuar që Gjermania të krijonte një fond për të paguar Ukrainën për humbjen e trashëgimisë kulturore të paçmuar në Luftën e Dytë Botërore, kur pjesë të mëdha të vendit, atëherë pjesë e Bashkimit Sovjetik – u pushtuan nga forcat naziste.
Komentet e Melnik vijnë pasi ministrja e Jashtme gjermane Annalena Baerbock u takua me homologun e saj rus Sergey Lavrov të martën në Moskë, për të diskutuar çështje duke përfshirë tensionet rreth Ukrainës. Ajo u takua me krerët në Kiev të hënën.
