Ish-lideri ukrainas po përballet me akuzat për tradhti dhe shpërdorim detyre, por një gjykatë në Kiev ka refuzuar kërkesën e prokurorëve për të vendosur ish-presidentin Petro Poroshenko pas hekurave.
Megjithatë sipas RT-së, gjykata urdhëroi që Poroshenko të ndalohej të largohej nga vendi ndërsa është në pritje të gjykimit për akuzat e rënda.
Të mërkurën, gjyqtarët në Gjykatën e Qarkut Pechersky vendosën për një regjim lirie të kufizuar ndaj ish-udhëheqësit dhe e urdhëruan atë të heqë dorë nga dokumentet e përdorura për udhëtime ndërkombëtare.
Gjykata, megjithatë, nuk pranoi kërkesën e prokurorisë për arrestimin e ish-presidentit ose vendosjen e garancisë për 35.8 milionë dollarë. Në vend të kësaj, gjyqtari Oleksiy Sokolov tha se ish-presidenti duhet të paraqitet para prokurorëve dhe hetuesve kur të udhëzohet për ta bërë këtë.
Duke u larguar nga gjykata pas shpalljes së vendimit, politikani tha se është shumë herët për të festuar, sepse “skenari i çmendur i Presidentit Volodymyr Zelensky nuk ka përfunduar ende”. Ai këmbëngul se akuzat janë të motivuara politikisht dhe të dizajnuara për të tërhequr vëmendjen nga rënia e popullaritetit të pasuesit të tij, ekonomia e ngadaltë dhe trajtimi i pandemisë Covid-19.
Vendimi vjen pasi prokurorët ukrainas i kërkuan një gjykate në Kiev që të caktojë kushtin për ish-presidentin në 35 milionë dollarë ose ta dërgojë atë në burg për dy muaj.
Poroshenko u largua nga Ukraina në dhjetor pasi mori një thirrje për t’u marrë në pyetje në lidhje me akuzat. Ai u kthye nga Polonia të hënën, duke thënë se donte të ndihmonte Ukrainën të përballej me “kërcënimin në rritje të pushtimit rus” dhe “tradhtisë” nga pasardhësi i tij, Zelensky. Poroshenko udhëhoqi ish-republikën sovjetike nga viti 2014 deri në vitin 2019. Ish-kreu i shtetit është një nga oligarkët më të pasur të vendit dhe thuhet se ka grumbulluar një pasuri neto prej 1.6 miliardë dollarësh. Ai njihet gjithashtu si “mbreti i çokollatës” i Ukrainës.
