Ish-kancelares gjermane Merkel i është ofruar roli kryesor në një ‘organ këshillimor të nivelit të lartë për të mirat publike globale’, raportoi Deutsche Presse-Agentur (dpa) të mërkurën, duke cituar burime brenda qarqeve të OKB-së.
Raporti nuk specifikoi qëllimin e punës së bordit këshillues, por tha se bordet ndërkombëtare si këto merren me çështje globale si shtresa e ozonit, siguria e aviacionit dhe tregtia botërore.
Agjencia e lajmeve tha se Sekretari i Përgjithshëm i OKB-së Antonio Guterres i shkroi një letër personale Merkelit, duke i ofruar vendin e punës. Megjithatë, mundësitë që ish-kancelarja të pranojë postin ‘janë mjaft të ulëta’, tha dpa, duke shtuar se një përgjigje zyrtare nga Merkel nuk është marrë ende.
OKB-ja nuk e komentoi këtë çështje për dpa. Merkel dha dorëheqjen si kancelare muajin e kaluar pas 16 vitesh në pushtet. Ajo ishte kancelarja e dytë më jetëgjatë e Gjermanisë si dhe një nga udhëheqëset më jetëgjatë në pushtet në BE.
Pozicionet e larta të OKB-së shpesh janë të zëna nga ish-krerë shtetesh dhe politikanë veteranë. Vetë Guterres shërbeu si kryeministër i Portugalisë, ndërsa Michelle Bachelet, e cila u zgjodh dy herë si presidente e Kilit, është e dërguara kryesore e organizmit global për të drejtat e njeriut.
