Presidenti i Republikës, Ilir Meta ka mbështetur nismën e Konfidustrisë shqiptare për të pezulluar përkohësisht procesin e fiskalizimit deri në dhënien e sigurive të plota për mbrojtjen e të dhënave tregtare të bizneseve pas publikimit të listës së rrogave dhjetorin e vitit 2021.
“Pasi jam njohur zyrtarisht, si dhe duke vlerësuar interesin e madh publik, kushtetues, sigurisë kombëtare dhe përgjegjësive euroatlantike të vendit, mbështet nismën e Konfindustrisë për pezullimin e përkohshëm të procesit të fiskalizimit të detyrueshëm për bizneset, deri në dhënien e sigurive të plota teknike dhe ligjore nga shteti shqiptar për mbrojtjen e të dhënave tregtare të bizneseve”-shkruan Presidenti.
Më tej Kreu i Shtetit i ka tërhequr vëmendjen institucioneve shtetërore se skandali i rrjedhjes së të dhënave tregon problematikat e shumta të sigurisë së rrjeteve të informacionit.
Presidenti shkruan se pasojat do jenë më të rënda në të ardhmen nëse nuk sigurohen të dhënat gjithashtu ka mbështetur kërkesën për ngritjen e komisionit hetimor parlamentar për zbardhjen e plotë të skandalit.
“Skandali i rrjedhjes së të dhënave personale të qindra mijë qytetarëve shqiptarë në dhjetor 2021 drejtpërdrejt nga agjensia shtetërore përgjegjëse AKSHI, tregon problematikat e shumta të sotme të sigurisë së rrjeteve të informacionit.
U tërheq vëmendjen institucioneve shtetërore, që në rastin e ngjashëm të mundshëm të rrjedhjes së të dhënave masive të siguruara në kohe reale nga procesi i fiskalizimit me detyrim edhe nga dhjetëra kompani private ndërmjetëse, pasojat do të jenë shumë më të rënda sesa të skandalit të dhjetorit 2021.
Në ketë rast pasojat do të jenë të rënda për mbi 120 mijë biznese, që rrezikohen nga penalizime gjyqësore në vlera të jashtëzakonshme për shtetin shqiptar, goditje në afatgjatë për ekonominë dhe deri në cenim të sigurisë kombëtare dhe rendit kushtetues.
Mbështes gjithashtu kërkesën për ngritjen e komisionit hetimor parlamentar për nxjerrjen e plotë dhe marrjen e përgjegjësive penale dhe financiare të institucioneve shtetërore dhe kompanive private, shkaktarë të skandalit të rrjedhjes në publik të të dhënave personale të qytetarëve dhe bizneseve në dhjetor 2021”-përfundon Meta në postimin e tij në rrjetet sociale.
